Merkezê Çapemenî û Îrtîbatî yê HPGyî derheqê çalakîyanê gerîlayan de eşkerayî daye.

HPGyî da zanayene ke roja 11ê Teşrîna peyêne de saetanê sibayî de artêşa tirkî ya îşxalkare wareyê Gelî yê pabesteyê herêma Gabar ê Şirnexî de operasyonêk da destpêkerdene û vat: “Heman roje de nizdê saet 12.00 de hêzanê ma yê YJA STARî hemverê yewîyêk ke waştenê xo qilê Derîyê Seqetî de bica bikero çarçiwaya Hemleya Şorişgêre ya Şehîd Delal Amede û Şehîdanê Besta de çalakîyêka sabotajî viraşte. Netîceyê çalakîye de ame tesbît kerdene ke 7 leşkerî ameyê kiştene. Çalakîye ra dima artêşa tirkî ya îşxalkare leşkeranê merdeyan bi helîkopteranê Skorskyan wareyî ra wedartî.”

HPGyî da zanayene roja 11ê Teşrîna peyêne de teyareyanê artêşa tirkî ya îşxalkare saet 13.40 de wareyê Ermûşî yê pabesteyê herêma Xakurkê ya Wareyê Pawitişê Medya, saet 20.00 de zî dewa Sîda ya pabesteya herêma Zapî bombardûman kerde. HPGyî ard ziwan ke bombardûmanî ra dima rez û baxçeyanê dewijan de hesaro madî virazîyayo. HPGyî vat vîndîbayayeyê gerîlayan çinyê.

XEBERÊ KE VANÊ GERÎLAYAN HÊRIŞÊ HEWAYÎYÎ DE CUYA XO KERDA VÎNDÎ ZÛR Ê

HPGyî vat: “Artêşa tirkî ya îşxalkare bi rayîrê çapemenîya şerî ya taybete derheqê hêrişanê bejayî û hewayîyan ê ke rojanê  9, 10 û 11ê Teşrîna peyêne de ameybî kerdene îdîa kerdibi ke gerîlayan derbeyê giranî werdê. Nê îdîayî zûr ê û tu têkilîya înan bi raştî çinya. Amacê xeberanê winayênan no yo ke serfirazîya Gerîlayanê Azadîya Kurdistanî binimnê û moralê şarê ma xira bikerê. Bîlançoya tewr raştekîne ya şerê Kurdistanî hetê HPGyî ra rayapêroyîye rê yena resnayene. Wa şarê ma hemverê xeberanê teberê raştî yê medyaya şerê taybetîyî haya bibo.”