Her roje kesê neweyî beşdarê çalakîya grevê vêşanîye benê û humara çalakwanan her ke şono bena zêde. Goreyê malumatanê peyênan yew hetî  ra 50 hepisxaneyan de çalakîya 220 hepisîyan a bêwext-bêdore dewam kena, hetê bînî ra zî 130 hepisxaneyan de  çalakîyê bê-xewt ê bidore dewam kenê. Tayê Hepisxaneyê ke tede çalakîye dewam kena de, hetê îdareyî ra çalakwanan rê tedayî yenê kerdene. Bi taybetî zî Hepisxaneyê Xarpêtî yo ke roja verî ra nat bi teda û îşkence rojeve ra nêgineno war o de bî eşkera ke îdare çalakwananê grevê vêşanîye qismo ke Daîş, El Nusra û Fetullahîyî tede manenê, uca de ca keno.

Serekê Komîsyonê hepisxaneyî yê Baroya Amedî Av. Bûnyamîn Şeker girewteyan de ame têhet û no derheq de malumat da ANFyî. Şekerî malumatê xo de beyan kerd û vat Hemsereka  KCDyî Leyla Guvene 8ê Teşrîna peyêne ra nat çalakîya xo domnena  ra heta ewro hezarî ra zêde girewteyî çalakîya vêşanîye ya bêwext a bidore, 220 ra zêde girewteyî zî çalakîya vêşanîye ya bêwext a bêdore domnenê.

HEPISXANEYAN DE TEDAYÊ KEYFÎYÎ

Av. Şeker 2 serran ra zêdeyêrî yo ke komîsyonê hepisxaneyan de ca gêno û malumatê xo de wina dewam kerd: “Seba ke ma ney komîsyonî de xebetîyenîme Hepisxaneyan de îxlalkerdişê heqan baş zanîme. Ma xeylî hepisxaneyî zîyaret kerdî û no derheq de xeylî raporî pare kerdî. Bi taybetî zî îlankerdişê OHALî ra dima teda û îşkenceyê keyfîyî hîna bîyî zêde.”

ÇALAKVANÊ GREVÎ ERZÎNÊ BI HUCREYAN

Av. Şekerî bale ante Hepisxaneyê Elezîzî ser û va: “Hepisxaneyê Xarpêt de 16ê kanûne ra nat 10 girewteyî çalakîya vêşanîye ya bêwext a bêdore domnenê.  Uca de xora hucreyê tecrîdkerdişî yê tek kesinî estê. Goreyê Qanûnê Cezaya înfazî kesê ke sucanê cîyayan ra yenê girewtene ganî yew ca de nêrê girewtene. Labelê Hepisxaneyê Elezîzî de PKKyî yê ke çalakîya vêşanîye domnenê DAÎŞ, El Nusra û Fetullahîyan reyde eynî qisim de yenê girewtene. No, provakasyonî rê zemîn dano viraştene. Hetê bînî ra Hepisxaneyê Trabzonî de zî çalakwanê grevê vêşanîye erzîyaybî hucreyan. Hepisxaneyo Girewte yê Cinîyan ê Kirikkale û Sîncan de zî halê sey nînan estê.”