Çeteyanê DAÎŞ’î bi hewanan hêrişê dewa Dara ya qezaya Daqûqî ya Kerkûkî kerd. Netîce de 4 kesî birîndar bîyî. Gama ke keyeyêk dewe ra remayêne, nizdê cayê kontrolî yê Daqûqî de wesayîtê înan ame pawanayene û netîce de 6 endamanê keyeyî cuya xo vînî kerde.

Şewa bîne saetanê erey de çeteyanê DAÎŞ’î dewa Dara ya pabesteya qezaya Daqûqî ke Kerkûkî ser o ya bombarduman kerde. Netîce de 4 kesî birîndar bîyî, înan ra yewe cinî ya. Goreyê hayîdarîyanê çimeyanê Nêweşxaneyê Daqûqî, dimayo ke çeteyanê DAÎŞ’î hewanî eştê dewe, keyeyêk bi wesîleya ke xo bixelesno dewa Dara ra ver bi Daqûqî kewto rayîr. Polîsanê federalî yê Iraqî nuqteya kontrolî de înan ser o guleyî varnayî, netîce de heman keyeyî ra 6 kesan cuya xo vînî kerda. Dimayo ke birîndar û cenazeyê kesanê ke cuya xo vînî kerda ameyî berdene bi nêweşxaneyê Daqûqî mabênê Polîsanê Nêverdayîşê Sûcî yê Daqûqî de û Polîsanê Federalî de pêkewtiş vejîya û na yewe ra efserêk ame kiştene.