'Şert o ke nê demî de kongreya neteweyî bêra kerdene'

Hemserekê Kongraya Cimatî ya Demokratîke (KCD) û Parlementerê Agirî Berdan Ozturkî destnîşan kerd ke Kurdî prosesê tarîxî de yê û vat, şert o ke nê prosesî de kongreya neteweyî bêra pêardene.

Hemserekê Kongraya Cimatî ya Demokratîke (KCD) û Parlementerê Agirî Berdan Ozturkî derheqê zîyaretê Hêrema Federale ya Kurdistanî û babetanê rojdemî de ANF rê qisey kerd.

‘Vera Kurdan Hişmendîya Îşxalkerdişî Yew a‘

Ozturkî ard ziwan ke Kurdî Rojakewtena Mîyanêne û Tirkîya de dewrekê tarîxî ra derbaz benê û wina qisey kerd „Verê nikayî seba zîyaretê Başûrî plansazî ameybî kerdene labelê qewemîyayîşanê Bakurî ra serkewte na plansazîye ameye apeydeeştene. Pêro polîtîkayê hikumetê Tirkîya çinkerdiş û înkarkerdişê Kurdan ser o yenê kerdene. Tirkîya bi nameyê operasyonanê Pençe, Pençe 1, 2 û 3‘yî‘ erdê Başûrî îşxal kena. Serra 2003‘yî de Başûrî de di qereqolê Tirkîya estbî la nika hûmara qereqolan bîya 36. Reyna rewşa Rojawanî zî wina ya. Xeta sînorî ser o çekê giranî ameyê cakerdene. Nê hîrê serranê peyênan de zaf çî ameyî zelalkerdene. Hukumeto faşîst ê AKP-MHP nêwazeno ke Kurdî bibê wayîrê kemere û seba na yewe meqewemîya her hetî ra galê bi Kurdan keno. Vizerî Efrîn îşxal kerd, xora prosesê referandûmê Başûrî warye de yo. Tirkîya verê çimanê pêro dinya de gef bi Başûrî werd û berê sînorî girewtî. Hişmendîya ke Efrîn dagir kerd û hişmendîya cadkerdişê dagirkerdişê Başûrî û hişmendîya tayînkerdişê qeyûman eynî ya. Nê pêro çî dewamê şerê taybetî yê vera kurdan ê. Serdana ma ya Başûrî de nê pêro babetî ameyî munaqeşekerdene û ma vînî xo yewbînî rê parekerdî.  Birêz Mesud Barzanî, Neçîrwan Barzanî, Mensur Barzanî û Berhem Salihî nê çî bi zerrîyeka germe pêşwazî kerdî û na serdana ma gelek girîng dîye.”

‘Cepheyê Demokrasî‘

Ozturkî da zanayene ke hukmatê Başûrî qewemîyayîşanê Bakurî nêzdî ra teqîp keno û wina dewam kerd „Sîyasetmedaran ser o operasyonê sîyasî dewam kenê. Nêzdîyê des hezar endamê HDP‘yî ameyê girewtene. Reyna sey her wextî galê bi KCD‘yî kenê. Di rojan ra verî Wan de endema dîwana ma gîrîyaye binê nezaretî.  Seba ke komelê Kurdan tewr bi awayekê xo organîze mekero bi her şeklî galan kenê. Başûr zî nê galan vîneno û nêzdî ra teqîb keno. Yewbîndîyayîşî de ma na yewe nirxnaye. Vera hende galan HDP reyna zî hertim cuya azad û seypêyî de israr kena. Vera cepheyê faşîst yê Tirkîya ma ganî cepheyê demokrasî xurt bikerÊ. Cepheyê Demokrasî tena seba Tirkîya nîyo, seba pêroyê Rojkewtena Mîyanêne lazim o. Eke ewro meseleya Kurdan bêra çarekerdene do Tirkîya Rojakewtena Mîyanêne rê bereyî bika. Eke na mesela mêra halkerdene AKP do Tirkîya ver bi tarî bêra. Ganî êdî her kes birra xo bido. Yan rayîrê demokrasî yan zî rayîrê faşîzmî. Tarîx de gelek nimûneyê na yewe estê û roj bi roj ma na yewe Tirkîya de cuwîyenîme. Tirkîya de her hetî ra galê bi muxalefetî yeno kerdene û wazenê ke vengê muxafeletî bibirnê.”

‘AKP-MHP bi Şerî Emrê Xo Kenê Derg‘

Ozturkî destnîşan kerd ke AKP-MHP bi şerî wazenê ke emrê xo derg bikerê û wina dewam kerd “Tirkîya her hetî ra mîyanê şerî de ya û bi şerî wazenê ke emrê îqtîdarê xo derg bikerê. Tirkîya de eke şer, kaos û krîz çin bo AKP-MHP zî do çin bê. Seba na yewe zî HDP û sazgehê Kurdan hêvîyeka pîle danê komelî. Armancê ma yo sereke o yo ke ma Tirkîya de cepheyê demokrasî xurt bikerîme û çar hetanê Kurdistanî de yewîya neteweyî biafirnê. Nê şert û mercan de ke hendê galî destkewteyanê Kurdan ser o ênê kerdene kongreya neteweyî elzem a. Ganî her hetî de şarê Kurdan yewîya xo awan bikeo. Wexto ke ma benîme parçe her hetî ra galê bi kurdan kenê. Rojawan, Başûr û Bakurî de galî yenê kerdene. Kurdî hêzdar û eşkenê vera na yewe vinderê. Ma pêrunan na yewe wextê galanê DAÎŞî de dîye. Tena ganî kurdî bibê wayîrê yewîye û bibê yew.”

‘Wezîfeyo Verên Organîzekerdişê Kongreya Nteweyî yo‘

Ozturkî ard ziwan ke sey KCD‘yî wezîfeyo tewr verên organîzekerdişê Kongreya Neteweyî ya Kurdan o û wina dewam kerd „Seba Kongreya Neteweyî ya Kurdan bêra organîzekerdene şertê ewroyî yê vizerî ra başêr ê. Her kes êdî eşkera dişmentîya xo vera şarê kurdan îlan keno. Yewîya Kurdan ewro seba partî yan zî sazîyekê çin a. Yewîye seba şaranê Kurdistanî ya û ganî na yewe zî gamê raver bêra raardene. Galim nanê ra nasnameya Kurdan ra. Ganî her partî û organîzasyonê kurdan îdeolojî û menfeatanê xo biderê hetekê û vera galkerdişan vinderê. Hukumetê Başûrî zî ard ziwan ke çarekerdişê meseleya Kurdan yewîya neteweyî ya. Sey Bakur û Başûrî ma ard ra ziwan eke ewro şarê Kurdan yewîya xo awan mekero û mereso statuyê xo  do na mesela heta seserra bîne zî dewam bikera. Ma do seserra bîne zî vîndî bikerê. Derheqê Kongreya Neteweyî de fikrê ma û yê hukmatê Başûrî yew o. Tewr kes yewîye ra sewbîn çîyekê cîyayî nêwazeno.

‘AKP û MHP Demê Ameyoxî Yê Tirkîya Tarî Kenê‘

Ozturkî destnîşan kerd ke AKP û MHP demê ameyoxî yê Tirkîya tarî kenê û nê çî vatî: “Tarîxî ra bîyo çi taw ke hukumetê Tirkîya kewenê tenge meselaya Kurdan seba xo xebitnenê. Nika AKP-MHP wazenê ke rejîmê faşîstî xurt bikerê. AKP-MHP meşruyîtê xo vîndî kerdo û nika zî wazenê ke bi şerê vera kurdan xo biderê ciwîyayene. Nika AKP-MHP pêro hêzê xo dayo galê vera HDP‘yî. Berê HDP‘yî seba her kesî akerde yê. Çunke HDP partîya şaran a. Ma mayan rind fam kenê, mayî heqdar ê. Demo ke zerrîya merdimî biveşa merdim eşkeno her çî zî bikero. La çîyo girîng no yo ke ganî ma û keyeyê ma alatê kayê AKP meberê. Ganî her kes ser  o bifikirîyo gelo nê ciwanî çira verê xo danê koyan? Sebebê na yewe çi yo? Sebebê naye şer o û sebebê şerî zî AKP û MHP ya. Çarekerdişê nê şerî zî haştî ya. Problem esto labelê AKP-MHP seba ke mesela hal mekerê û payan ser o bimanê gal kenê. No problem tena ê HDP‘yî nîyo. Na mesela pêro partî û sîyasetmedaran a. Ganî na mesela meclîsî de bêra halkerdene. HDP seba çarekerdişî her tim amade ya. Gelo kesê ke adirê şerî geş kenê zî amade yê? AKP-MHP bi nê çîyan çîyek nêfîna xo dest û eksê ney de Tirkîya ver bi tarî beno.”