Şopê gonî yê qeraxê Munzurî aîdê Eroglûyî vejîyayî

Dêrsim de kîşta şewqe û telefonê Engîn Eroglûyo ke şiwanîye kerdêne û bibi vînî şopê gonî ameybî dîyene û ame tespîtkerdene ke a gonî aîdê Eroglûyî ya.  

Dewa Yaylagunu ya pabesteya qezaya Pulurî ya Dêrsimî de, 15’ê Hezîrane de Engîn Eroglûyo (28) ke pesê xo çerênayêne vînî bibi. Rixmê heme cigêrayîşan de zî 11 rojî yo Eroglûyî ra tu xeberêk nêna girewtene. Xeylî grûbê xelesnayîşî yê ke bajaranê bînan ra ameyê Royê Munzurî de xebatanê cigêrayîşî domnenê.

 Yeno Gumankerdene ke Awa Munzurî de Şîyo

Yeno gumankerdene ke berê bagaja kaleke ya otobusa raywanan ginayo Eroglûyî ro û kewto Royê Munzurî. A gama ke otobuse ginena piro raywanêk zî bi telefonê xo dîmenan anceno û Eroglû nê dîmenî de vejêno. Cayo ke Eroglû dîmen de yeno dîyene ser o cigêrayîş ame kerdene, şewqa û telefonê ê ameyî dîyene û heman wextî de şopê gonî ameyî dîyene. Dimayê vînayîşê na gonî pîyê Eroglûyî, Îbrahîm Eroglûyî ra nimûneya gonî amî girewtene û seba tespîtî şirawitî Nêweşxaneyê Unîversîteya Yuzuncuyilî ya Wanî.

 Gonî Aîdê Eroglûyî ya

Testê DNA’yî de vejîya werte ke şopê gonî yê ke ameyê dîyene aîdê Engîn Eroglûyî yê. Birayê ê Ahmet Eroglûyî zî da zanayene ke şopê gonî yê birayê ê yê û la meseleyê tespîtê otobuse de hewna zî nêresayê hayîdarîyêk.