Ûzûner: Rayêk nê, ma do nêverdê çaryewê raye zî bitirê

Endamê Organîzasyonê HDP’yî yê Stenbolî yê karanê weçînitişî ra mesuldar Cengîz Ûzûnerî vat seba asayîşê weçînitişî ê bi hesasîyêtêkê pîlî xebetênê û vat, ê do nêverdê ke çaryewê rayêk zî bêro tiritene.  

Seba weçînitişanê cayîyan ê Stenbolî ke bi fermanê serekkomarê Tirkî Tayyîp Erdoganî amebi betalkerdene tena çend rojî mendê. Stenbol de do 1930 mekteban de 31 hezarî û 185 sindoqan de rayî seba weçînitişê şaredarê Stenbolî bêrê dayene. Partîya Şaran a Demokratîke pîya bi xebatanê seba weçînitişî bi heman hawayî seba asayîşê sindoqan endam û muşahidanê xo perwerde kena.

Perwerde bi serkêşîya Organîzasyonê HDP’yî yê Stenbolî heme qezayanê Stenbolî de yeno dayene. Îdarekaranê organîzasyonê HDP’yî yê Stenbolî ra yo ke weçînitişan ra mesuldar o Cengîz Ûzûnerî derheqê asayîşê sindoqan û perwerdeyanê xo de hayîdarî daye.

39 Qezayanê Stenbolî de Embazê Ma Wezîfedar ê

Ûzûnerî ard ziwan weçînitişê verê nikayî de HDP’yî seba asayîşê sindoqanê rayan xebatêka hesase kerda û vat, “Çar weçînitişanê ravêrteyan de 12 hezarî embazê ma sindoqanê rayan de wezîfedar bîyî. Naye ra ma wayîrê kadroyêkê bitecrube yê. Tûzla ra heta Sîlîvrî 39 qezayan de wezîfedarê ma verê sindoqanê rayan de estê.

Xebatê Ma Seba Binfînayîşê AKP-MHP’yî yê

Hemserekê ma Sezaî Temellî û parlamenterê ma yê Êlihî Şukru Tîryakîyî roja Sêşemeyî Bagcilar de bi wezîfedaranê heyetê sindoqanê raydayîşî dir kombîyayîş viraşt. O kombîyayîşo peyên bi. Stratejîya ma ya weçînitişî seba binfînayîşê faşîzmê AKP-MHP’yî yo. Naye ra pêvînayîşê ma yê partîyanê muxalefetî reyde dewam kenê. Dîyalogê ma înan dir esto. Seba asayîşê sindoqanê raydayîşî ma înan dir hemkarîye kenê.

Ganî îradeyê weçînitoxan bi hawayêkê rastî vejîyo werte, rast bêrê mardene. Ma daneyanê verê nikayî ra zanê ke hîleyê weçînitişî zaf ê. Weçînitişanê 31’ê Adare de ma rayîr nêda hîleyan. Ma zanê ke ê weçînitişanê Stenbolî de bin kewtê. Ma do destûr nêdê hîleyan. Asayîşê sindoqanê raydayîşî xeylî muhîm o. Rayêk nê, ganî ma nêverdê nîmeyê rayêk, çaryewê rayêk zî bêro tiritene. Ma do destûr nêdê. Dimayê weçînitişî ra heta ke sindoqê raydayîşî şirê heyetê weçînitişî yê qezayan do cayê raydayîşî de bimanê.“