Avûkat Dervrîm Bariş Baranî derheqê recrîdê vera Rayberê Şarê Kurdî Abdullah Ocalanî de qisey kerd û ard ziwan ke 21 serrî yo ke Îmrali de huqûq yenı binpay kerdene.

Baranî vat: ''Vera Birêz Ocalanî birê sîyasîyî yenê girewtene. Qanûn werte de yo, dewlete qanûn bin pay kena, madeyanê qanûnî nêana ca. Wextê prosesê çareserîye de xeylêk sîyasetmedar û selahîyetdaranê dewlete Birêz Ocalanî reyde pêvînayîş kerdêne. Dewlete huqûq goreyê zerrîya xo xebitnena û huqûq nêno caardene. Birêz Ocalan rayberê şarê kurdî û sîyasetmedar o. Wexto ke mekanîzmayê huqûqî kewenê dewre û Birêz Ocalan rolê xo ano ca welat nefesêk gêno. Ma no prosesê çareserîye de dî.

Birê Îmraliyî sîyasî yê. Rewşa ci goreyê rewşa Rojawan û Sûrîye vurîyena. Nika Rojawan de sîstemêk awan bîyo û kurdî wayîrê destkewteyan ê. Dewlete coka Îmrali de tecrîd kena xorin. Dewlete wazena her çi kontrol bikera. Tirkîya de demokrasî her roje pey de maneno û polîtîkaya şerî aver şina. Na polîtîka heta peynî do dewam nêkera û rojêke peynîya ci do bêra û metodê haştîye do bikewê dewre.

Neteweyanê Yewbîyayeyan û Konseya Ewropa seba tepişteyanê sîyasîyan venga Tirkîya da la Tirkîya de reyna zî qanûnêkê seba înan nêame caardene. Kiştox, tecawuzker û cergî ameyî vera dayene. Birêz Ocalan seba çareserîya meseleya kurdan û yê tirkîya aktoro tewr bitesîr o. Coka ganî şert û mertê cuya Ocalanî hol bibê. No zî pê qedînayîşê tecrîdî yeno caardene. Huqûq seba her kesî lazim o û ganî her kes huqûq bîyaro ca.''