Dêrsim: Wa vera seydwananê qaçaxan cipersayîş bêro kerdene

Baroyê Dêrsimî semedê seydwanîya qaçaxe pêhesnayîşê sûcî kerdbi. Serdozgerîye qerarê cipersayîş hewce nêkeno da. Baro do vera nê qerarî îtîraz bikero.

Baroyê Dêrsimî  25ê kanûna 2019î de derheqê seydwanîya qaçaxe ya ke bajar de yena kerdene de Serdozgerîya Komare rê pêhesnayîşê sûcî kerdbi. Serdozgerîye qerarê cipersayîş hewce nêkeno da. Baro do vera nê qerarî îtîraz bikero.

Serekê Baroyê Dêrsimî Kenan Çetînî vist vîrî ke înan seba ke seydwanîye bajar û qezayanê ci de zêdîyaye û bitaybetî zî bizê koyî yenê kiştene înan pêhesnayîşê sûcî kerd û vat qanûnê vera seydwanîya qaçaxe estê û ganî nê bêrê caardene. Çetînî vat bawerîya Xizirî de xoza zaf girîng a, ganî na hîssdarîye hetê meqamanê edlî û îdarî ra zî bêro vînayene û goreyê ci bêro têgêrayene. Çetînî da zanayene ke ê do vera nê qerarî îtîraz bikerê û  veng da şarê Dêrsimî ke wa hîşyar bo û destûr nêdo seydwanan.