Hemserekê Konseya Rayberdişî ya KCKyî Cemîl Bayik beşdarê Bernameyê Taybetî yê Stêrk TVyî bi. Bayikî derheqê tecrîdê vera Ocalanî de û babetanê bînan de tay ercnayîşî kerdî. Ercnayîşanê Bayikî ra beşêk wina yo:

"Tecrîdê vera Rayber Apoyî eleqeyê ci bi serebûtanê Rojhelatê Mîyanênî esto. Rojhelatê Mîyanênî de şerêko pîl esto. Rayber Apo îradeyêkê sîyasî yo pîl o, ey Rojhelatê Mîyanênî de nameyê merdimîye ser o têkoşînêko bêhempa kerdêne. Coka waşt ke ey tecrîd bikerê. Par vera tecrîdî têkoşînêko pîl ame kerdene û netîceyê ci de îqtîdarê AKP-MHPyî neçare mendî ke seba pêvînayîşan destûr bido avûkatan. Nê têkoşînî têna seba kurdan ney seba hêzanê demokrasîyî zî netîceyêko pîl bi. Zaf kesan dî ke tecrîd û demokrasî têkîldarê yewbînan ê. Eke Tirkîya hetê demokrasîyî ra wazena aver şora ganî tecrîdê vera Rayber Apoyî biqedo. Tecrîdê vera Rayberê Apoyî têna seba kurdan ney seba hêzanê demokrasîyî zî girîng o. Faşîzm têna bi rayîrê şiknayîşê tecrîdî do bin bikewo.

Ganî şarê Tirkîya û pêro hêzê demokrasîyî vera tecrîdî pîya vinderê. Eke vera tecrîdî tewirêko bihêzî bêro mojnayene hêrişê qirkerdişî zî do biqedê û Tirkîya zî bena demokratîk. Ganî pêro parçeyanê Kurdîstanî de kurdî vera tecrîdî vinderê. Eke tecrîdê vera Rayber Apoyî bêro şiknayene, tecrîdê vera kurdan zî bêro şiknayene. 15ê sibate ha bena nêzdîye. Ganî çalakîyî bêrê kerdene.

Gerîlayanê ma pêro xîretê AKP-MHPyî çin kerdî. Gerîlayan destûr nêda îqtîdar ke sîstemê Tirk-Îslamî awan bikero. Coka îqtîdarî şer kerd xorin. La xoverdayîşê gerîlayan hem dinya de hem zî Tirkîya de nê şerî bêtesîr keno. Înan waşt ke bi nê şerî îqtîdarê înan bimano, nîjadperestîye bihêz bibo.

Ganî heta ke îşxal biqedo Efrîn de têkoşîn û xoverdayîş dewam bikerê. Ganî ciwanê efrînijî tewrê têkoşînî bibê. Ez şehîdanê Efrînî yad kena û selam dana şarê Efrînî.

KDPyî seba hêrişê Şengalî vengê xo nêvet. Hem vanê ma kurd ê seba kurdan têkoşîn kenê. Hem zî Şengal de qirkerdişî yenê kerdene û vengê KDPyî nêvejîyeno. No seba înan şerm o. Ganî şarê ma ney bivîno. Kamî ke vera qirkerdişan bêveng manenê ganî şarê ma zî vera nînan tewirêk bimojno. Pawitişê êzidîyan wezîfeyê kurdan o.

PKK û şarê kurdî azadîya cinîyan û şaran, biratîya şaran aver benê. Her kes zî pê naye hesîya. PKKyî vera DAÎŞî ewropa pawite. Coka DYA û YA hînî PKK sey 'rêxistina terorî' nêvînenê. Tay welatê Ewropa û sîyasetmedarê Ewropa wazenê ke PKK lîsteya terorî ra bêro vetene. Balçîka zî wina kerd. Cara bira rastikêne na ya. Ez venga Ewropa dana ke bira Belçîka sey esas bigêra.

Ganî pêro kurdî wayîrê ziwanê xo bivejîyê. Bi kurdkî qisey bikerê, binusê û biwanê. Ganî qet ziwanê asîmîlekaran qebul nêkerê. No zî şerêk o û şerêko pîl o. Eke ziwan û kultur biqedê kurdî mirenê. Eke kurdî nêwazenê bimirê ganî wayîrê ziwan û kulturê xo bivejîyê. Vera asîmîlasyonî vinderê.

Mexmur de bi waştişê Tirkîya KDP ambargoyêk keno. Kesêk nê ambargo qebul nêkeno û sey heq nêvîneno. Tirkîya biwaza zî ganî partîyêka kurde vera kurdanê bînan nê zulmî nêkera. Nê kerdişî fayde ney zerar anê. Ez bawer kena ke KDP do nê ambargoyî wedaro û nê sîyasetî biqedno."