HDPyî beyannameyê Konferansê Pîlî yê Tabîyî yê 3. eşkera kerd. 

Beyanname wina yo:

''Ma Kongreya xo ya 4. û konferansê xo yê ciwanan ê 2. û konferansê xo yê cinîyan ê 3. ra dima bi şîara ''HDPyo hîna bihêz, têkoşîno hîna bihêz'' 24-25ê çeleyê 2020î de bi beşdarbîyayîşê 600 delegeyan Konferanso Pîlî yê Tabîî yê 3. kerd. Ma konferans de têkoşînê xo yê di serran muneqeşa kerd. Ma kêmasî û zêdeyîyê xo ercnayî. Bi nê hawayî ma seba dewirê ameyoxî mîsyonê xo eşkera kerd.

Îqtîdaro Demokratîk

I. Ma îtîfaqê demokrasîyî û îqtîdarê demokratîkî hedef kenê

Hedefê ma nê yê; ma do îqtîdarê AKP-MHPyî, rejîmê yewmerdimî, faşîzm çin bikerê. Ma do bi vurnayîşê demokrasîyî îqtîdarê demokratîkî awan bikerê ke do bibo terefgîrê cinîyan, şaran, xoza, bawerî û pêro nasnameyan o

Seba vurnayîşî ganî gamê hemparî bêrê eştene. Partîya ma qerardar a ke seba ke hêzê demokrasîyî bibê alternatîf înîsîyatîf bigêra û rolê ronayoxî bigêra xo milî.

Coka ma venga pêro hêzanê demokrasîyî, kede û azadîye, roşnvîran, demokratan, hunermendan û merdimanê ke wayîrê wîjdan ê  danê ke Îtîfaqê Demokrasîyî de cabigêrê.

Têkoşînê Vera Tecrîdî 

II. Ma seba mesela kurdî demokrasî û çareserîya haştîyane de qerardar ê

Ma do vera AKP-MHPyo ke têna zereyê welatî de ney teberê welatî de zî dişmenîya kurdan keno têkoşînê xo dewam bikerê. Ma do zere de vera polîtîya qeyûman bi demokrasî û têkoşînê haştîye teber de zî vera îşxalê vera Rojawanî bi tewirê xo yê qerardarî têkoşînê xo pîl bikerê.

Ma do wayîrê kurdkî û pêro ziwananê dayîkan ê bînan bivejîyê û seba averşîyayîşê ziwan û kulturan paştdayîşêkê tewr pîlî bidê.

Ma do vera tecrîdê Birêz Abdullah Ocalanî têkoşînê xo bi heman qerardarî dewam bikerê  ke seba ke verê çareserîye bêro girewtene yeno kerdene. Konferansê ma reyna ard ziwan ke seba ke mesela kurdî de çareserîya demokratîke û haştîye tarîxîye bêrê kerdene hewce yo ke tecrîd bêro wedarene. 

Qerarê Konferansî

III. Ma do qerarê konferansê xo bîyarê ca

a. Konferansê ma qeraranê Konferansê Ciwanan ê 2. qebul kena û hedef keno ke ma do çareserîya meseleyan de û têkoşînê azadîye de ciwanan sey kerdox bihesibno.

b. Konferansê ma beyannameyê Konferansê Cinîyan ê 3. qebul keno û hedef keno ke paştî bido têkoşînê cinîyan. Ma do sîstemê hemserekîye û 'partîya cinîyan' ra apey gamêke nêerzê û têkoşînê têdûştîya cînsan berz bikerê.

c. Esasê qeraranê Konferansê Pîlî yê Tabîyî yê 3. ser o;

- Ma do têkoşînê kede û ekolojî pîl bikerê

- Ma do vera bêkarî, feqîrî û cînayetanê karî têkoşînê xo dewam bikerê.

-Ma do bibê vengê kede, feqîran û bindestan.

- Ma do sere de zîret de pîlkerdişê ekonomîyî û kooperatîfbîyayîşî esas bigêrê.

- Ma do bikerê ke pêro komelî bi nasname, bawerî û tradîsyonanê xo biciwîyê.

- Ma do vera îşkenceyê zîndanan, binpaykerdişê heqanê tepişteyan têkoşîn bikerê û ma seba Fîgen Yuksekdag, Selahattîn Demîrtaş û seba ê tepişteyanê bînan têkoşînê heq û demokrasîyî bikerê.

- Ma do seba ke şaredarîya komelgîre bêra caardene xebatan bikerê.

- Ma do cuya bi zaf ziwanan sey esas bigêrê.

- Ma do seba heqanê ci  multecîyan reyde bibê.

-Ma do xebata akademîye zêde bikerê.

Rêxistinbîyayîş

IV.Ma do seba ewro û vizêrê xo rêxistinbîyayîşê xo xurt bikerê

Ma do seba ke demokrasîyî û haştîya komelkî awan bikerê hîna zêde xo rêxistin bikerê. Rêxistinbîyayîşê partîya ma do bikero ke şarê ma hîna zêde nêzdîyê azadîye bibo.

V. Ma sîyasetê demokratîkî de qerardar ê, MA DO TEQEZ SER BIKEWÊ!

Xoverdayîşê HDPyî û hêzanê demokrasîyî û têkoşînî reyde rojê roşnîyî pabeyê ma yê. Ma qerardar ê ke têkoşînê demokrasîyî û haştîye de rolêkê girîngî bigêrê xo milî.

Vengdayîşê Kongre

Ma seba ke têkoşînê xo pîl bikerê venga pêro şarê xo, ciwanan, kedkaran, cinîyan danê ke beşdarê Kongreya ma ya pîle ya 4. bibê û wayîrê partî û ameyoxê ma bixevîyê.

Ma seba ke têkoşînê demokrasî, edalet û haştîye ser bikewo do hêvî pîl bikerê. Ma do pîya teqez ser bikewê!''