Wan de hewteyê verênî de eskeran eştîbî serê keyeyan û nê sereştişan de 41 kesî ameybî destbendkerdene. Mîyanê nê kesan ra 15 kesî bi îddîaya ke ’Îranî rê casûsîye kenê’ ameyî girewtene. Qiseykerdişê nê kesan ê telefonî sey ‘Emanetê mi xo vîr ra meke’ sey xebatêkê casûsîye ame ercnayene.

14’ê Gulane de eskeran eştîbî serê keyeyan. Operasyonê sereştişî tewr zêde dewanê Bakişik û Tûrgali de ameyî viraştene. 41 kesê ke 4 rojî nezaretî de mendê, ameyî berdene bi dadgehe. 15 kesê ke ameybî destbendkerdene bi îddîaya ke ’Îranî rê casûsîye kenê’ ameyî girewtene û 26 kesî zî bi şertê kontrolê edlî serbest ameyî verdayene.

Wazenê dewê serê sînorî bêrê talkerdene

Nê wextanê peyênan de zextê giranî bi dewijan yenê kerdene. Bi taybetî dewa Tûrgalîya Cor a ke tede qirkerdişê ’33 guleyan’ amebi kerdene. Dewijan vat, “Ma verê cû sînor ra derbaz bîyêne û şîyêne mazot ardêne. Nê 20 serranê peyênan de 200 kesê ke seba ardişê mazotî şîyê, ameyî qetilkerdene. Wazenê ma muhtacê xo bikerê. Qereqolî, bi têlanê jîletinan dêsî viraştî. Nika zî bi casûsîye ma sûcdar kenê. Wazenê dewê serê sînorî koç bi Îranî bikerê. Dewijê ke bazirganîye kenê, wexto ke telefon de qisey kenê yewbînî ra vanê ‘emanetê mi zî xo vîr ra meke’, no îddîanameyan de sey casûsîye ame qebûlkerdene. Kesê ke bazirganîya çaye û cixara kenê, qaşo casûsîye kenê.”