Derheqê ciwanê vînîbîyayeyî yê Dêrsimijî de qewimîyayîşêko newe

Engîn Eroglûyo (28) ke Dêrsim de 3 rojî yo xeberêk ci ra nêna girewtene û vînî bîyo, ame îdîakerdene ke berê bagaje yê otobusêkê mîyan-bajaran ginayo piro û kewto Royê Munzurî mîyan. 

Derheqê Engîn Eroglûyî yo ke qeraxê Munzurî yê Dêrsimî de, roja 15’ê Hezîrane de gama ke heywanê xo çerênayêne reyêk de werte ra bibi vînî îdîayêka balkêşe amî kerdene. Eroglûyo ke Dêrsim de bayîyêka GSM’yî de karker bi, peynîya hewteyî de şi dewa Yaylagunu ya Pulurî ke heywananê keyeyê xo biçerêno. Labelê dimayo ke şan de nêagêra keye, pîya bi dewijan keyeyê Eroglûyî seba vînayîşê lajê xo ê dormeyî de gêrayî û qeraxê Munzurî de telefonê destî, şewqa û şopa gonî dîyî. Bi îhtîmalo ke Eroglû ameyo remnayene cade xebere dîyaye Cendirmeyî. Rixmo ke pîya bi tewrbîyayîşê ekîpanê AFAD’î xebatê cigêrayîşî ame kerdene zî heta nika nêresayî Eroglûyî, labelê qewimîyayîşêko newe derheqê ê de virazîya.

Raywanêk ke fotografê menzere yê Munzurî antîbî û otobuse de raywanî kerdêne xebera vînîbîyayîşê Eroglûyî ra dima ferq kerd ke mîyanê fotografanê ê de Eroglû zî esto. Raywanî îdîa kerd ke berê bagaja otobusa înan xeripnaye bîyo û her game şofor peya bîyo û reyna padayo. Raywanî vat beno ke berê bagaje akerde mendo û ginayo Eroglûyî ro. Naye ser keyeyê Eroglûyî pîya bi ê dîmenan muracatê dozgerîye kerd. Pîya bi raywano ke dîmenê Eroglûyî ê dir estbî, şoforê otobuse vizêr şan de Stenbol de ameyî destbendkerdene û ameyî berdene bi Mudurîya Asayîşê Bajarî. Ame zanayene ke şoforî îfadeyê xo de vato ke ê Eroglû qe nêdîyo û do derheqê îdîayan de tu çîyêk nêvajo.

Birayê Eroglûyî Mesût Eroglûyî vat ke tu problemêkê birayê ci yewî dir çino, birayê ci hetê her kesî ra ameyêne heskerdene. Eroglûyî vat rixmê cigêrayîşê 3 rojan de hewna netîceyêk nêameyo girewtene û vat ke ganî selahîyetdarî hîna hîsdar bibê û mesela tavilî zelal bikerê. Eroglûyî vat îhtîmalê piroginayîşê berê wesayîtî zêde yo, labelê şoforê otobuse îdîa keno ke ê birayê mi qe nêdîyo. Naye ra derheqê qewimîyayîşî de hewna hayîdarîyêka zelale çina.