Erdê bajarekê Pêrî yê Qezaya Mazgêrdî ya Dêrsimî de ramitişê silgan yeno kerdene. Silqî menga teşrîna verêne de yenê ramitene û menganê teşrîna peyêne û kanûne de yenê arêdayene. Bajarekê Pêrîyî de emser 2 hezar donim erdî de siqî ameyî ramitene. Silqî dima ke yenê arêdayene yenê erşawitene Kargehê Şekerî yê Xarpêtî.

Citkarî her serre nêeşkenî heman hêga de silqan biramnê. Ganî çar serran de yew hêqa seba silqan bêro ramitene. Haşîm Kaya (57) des serre ra nat Pêrî de silqan rameno. Kaya derheqê ramitiş û arêdayîşê silqan de Ajansê Mezopotamya reyde qisey kerd û vat:

"Wexto ke ma hêgayan cite kenê ma erd kenê pak. Ma dermanê vaşan erzenê ci û dima hêgayanê xo ramenê. Eke varan nêvaro ma bi xo awe danê hêgayan. Wexto ke silqeyî newe newe pelanê xo kenê a ma înan newe ra cayê înan weçînenê ke ganî her 20 santîmî de yew silqe biba. Pelê silqêke çend zêde bibê berdar hîna zêde beno. Arêdayîşî ra 10 roje verê cû ma hînî awe nêdanê silqan û dima dest pê arêdayîşî kenê. Emser rîyê rewşa îklîmî ra wisarî de varan zaf vara ma silqî erey rameyî. Eke ti hol biewnî silqanê xo ti do ci ra berardişêkê weş gênî. Emser vayê silî û mazotî zêde yo û hewa xirab o. Naye ra ma nêeşkenê mîtan ra bivejîyê. Zaf citkeran emser zerar kerd.Erdê Pêrî zaf biberardiş o. Berhemê ma tabîî yê. Eke ma erdê xo de berhemanê xo ber nêkerê ma mecbur teberî ra şekerê binîşasta gênê. O zî zaf bizerar o."