Dezgehanê elewîyan ra seba Turgut Okerî vengdayîş

Dezgehanê elewîyan seba mehkemeya Turgut Okerî vengdayîşê tewrbîyayîşî kerd û vat: ''Turgut Oker têna nîyo, caardişê waştişanê elewîyan sûc nîyo.''

Roniştişê bire yê dewaya serekê rûmetî yê Konfederasyonê Yewîyanê Elewîyan ê Ewropa (AABK) Turgut Okerî 26ê sibate roja çarşemeyî saete 10:00 de Mehkemeya Cezaya Bingeyîne ya 25. ya Îstanbulî de do bêro dîyene.

AABKyî, Komeleyanê Elewîyan ê Demokratîkan (DAD), Komeleya Kulturî ya Pîr Sultan Abdalî (PSAKD) û dezgehanê bînan ê elewîyan seba Turgut Okerî venga pêro elewîyan da ke tewrê roniştişî bibê û vat: ''Turgut Oken têna nîyo. Caardişê waştişanê elewîyan sûc nîyo.''

AABKyî eşkerayîya xo ya 17ê sibate de dabi eşnawitene ke înan seba Turgut Okerî change.org de kampanyaya îmza daye destpêkerdene. Eşkerayîye de ame parekerdene ke Turgut Oker qiseykerdişan û eşkerayîyanê xo ra semed yeno hukmkerdene û bi na dewa dezgehê elewîyan zî heman wextî de yenê hukmkerdene. Eşkerayîye de ame vîrvistene ke Turgut Okerî tim waştişê elewîyan ardî ziwan û vera binpaykerdişê heqanê înan têkoşîn kerd.