Dikano ke bi fotografan xo de tarîxî hewêneno

Recep Mela Refîqo ke mîyanê 10 serran de 5 hezarî fotografê şexsîyetanê ke tarîxê Kurdan de wayîrê cayêkê muhîmî yê arê dayê, dikanê xo açarnayo bi muze.

Mehlaya Elîawa (Kanî Êskan) ya ke wareyanê tewr kanan ê Silêmanî ra ya bi zengînîya xo ya kulturkîye yena naskerdene. Rotoxo tîyayî bi dikanan û rengênîya xo bale ancenê xo ser. Recep Mela Refîq (66), eleqedarîya xo ya arêdayîşê fotografanê şexsîyetanê ke tarîxê Kurdan de wayîrê cayêkê muhîmî yê açarnaya bi xebatêka kulturkîye.

Recep Mela Refîqî arêdayîşî fotografan kerdo sey xuyêk û 10 serrî de 5 hezarî fotografî arê dayê. Fotografê rayberê PKK’yî Abdullah Ocalanî, yê Şêx Mehmûdê Berzencîyî, Qazî Mihemedî û Mela Mistefa Berzanîyî û hunermend, nuştox û şerwananê Kurdan estê. Muzeya ci her roje hetê bi desan kesan ra yena zîyaretkerdene.

Recep Mela Refîqî derheqê muze de nê vatî: „Amacê min o tekane pawitişê ravêrteyê neteweyê ma yo û şarê xo rê xizmetkerdiş o. Xeylî kesî bi peran şuxulênê. Labelê êyê ke mi dayê pêser malê hemeyê şarê Kurdî yo. Ez bi deyîranê Hesen Zîrekî dest bi roje kena. Bi hetkarîya domananê xo çend saetan dikan de manena.“