Ehmede: Cewabo ke hewce keno do bêro dayene

Endama Fermandarîya QSDyî Newroze Ehmed vera hêrişê îşxalî yê tirkî veng da roşnvîran û vat: “Amedekarîye ma est ê. Her kes do cewabo ke hewce keno bidê nê hêrişan.”

Endama Fermandarîya QSDyî Newroze Ehmed derheqê hêrişanê îşxalî yê dewleta tirke de bi roşnvîranê herêma Cizîre serê Zoomî ra kombîyayîş kerd.

Ehmede roşnvîran rê qala sebebê hêrişanê dewleta tirke û rewşa herême kerde û vat vera nê hêrişê îmha û înkarî yê vera şarê herême rolê ronşvîran gird o.

Newroze Ehmed vat: “ Dewleta tirke semedê hêrişê vera herême baheneyî afernayî. Dewleta tirke pê nê hêrişan estbîyayîşê şarê herême keno hedef.  Nê hêrişî heta merkezê Sûrîye yenê kerdene û têna nuqtayê leşkerî nînê hedefgirewtene. Şar binê tehluleyê girdî de yo. Erdogan semedê amadekarîya vîjnayîşî nê hêrişan dano kerdene. Vera nê hêrişan bêvengîye est a, verî zî vera hêrişanê dewleta tirke tewiro xurt nêame girewtene. Ma bitaybetî hetê ke paştî danê hêrişanê îşxakerdoxan, veng kerd înan. Nêrzîbîyayîşê ke vejîyayî werte rolêko rind kay kerd.  Pêvînayîşan de hetê ke paştî danê Şorişê Rojawanî ma nînan zî vînenî. Na raştîye rayîrê berê sersîyayîşê dewletanê ke paştî danê Tirkîya akerd. ”

Newroze Ehmed wina dewam kerd: “Hêzê ke herême de yê vînenê ke rîyê merdimanê DAÎŞî ke zîndanan û kampanê herême de yê ra hêrişê dewleta tirke yê vera herême tehluke yo. Her çiqas biney nêrazîbîyayîşî bibê zî, sere de nê hêrişan pê desturê nê hêzan dest pêkerd. Ma nê eşkera vînenê. Ma zanê ke heta ke desturê nê hêzan çînêbo nê hêrişê îşxalî nêeşkenê bêrêkerdene. Bitaybetî bi desturê hêzanê koalîsyonî ameyî kerdene. Rûsya wazena ke ma tay herêmen ra vejîyê. Waştişê înan oyo ke gama ke ma vakurê Sûrîye dir eleqedar bibê, wa hêzê rejîmî başûrê herême de ca bidê xo.  Dewleta tirke zî bitaybetî Tebqa, Reqa û Dêrazor de wazena şarî vera ma û koalîsyonî wirzino payan ser.  Kenê ke ma zehîf bikerê ke hêzê rejîmê Sûrîye herême bigêrê binê kontrolê xo.”

Newroze Ehmed ard ziwan ke Erdoganî planê xo nêardî ca û vat: “  Erdogan serkewtişo ke xeyalê ci kerdêne ne herême ma de ne zî Iraq de fîna dest. Coka nêvindeno. Her tim seba ke bireso waştişê xo do bixebito. Bitaybetî wazeno herêmanê sînorî îşxal bikero. Şertê Erdoganî semedê vindarnayîşê nê hêrişan oyo ke wa Îdareyo Xoser çîn bibo. Ne dostê Erdogan ne zî dişmenê ci yo daîmî est o, coka her rayîrî şuxulneno. Semedê herra ma bazarîye keno. Vera nê hukmatê Sûrîye tewirêko radîkal nêmijneno ra.”

Newroze Ehmed vat: “Amedekarîya ma ya leşkerî est a. Her çiqas biwazê şarê ma bitersnê zî, tewirê şarê ma xurt o.  Xora her kes do cewabo ke hewce keno bido nê hêrişan. Na babete de bitaybetî tewirê roşnvîran zaf muhîm o. Dewleta tirke pê rayîrê roşnvîran ferasatê xo yê îşxalî resneno komelî. La roşnvîranê ma ra vera nê tewirêko zelal est o. Roşnvîrî ganî wezfeyê xo dahîna hol bîyarê ca.”