Erdlerzê Xarpêtî yoke bi girdîya 6.8 de bi de 20 ra zafêr kesan cuya xo vînî kerde û ame vatene ke 1000 ra zafêr kesî  birîndar bîyî.

Wezîrê Weşîyê Tirkî Fahretîn Koca vat binê enkazî de heme merdimî estî û bano ke hûmara merdeyan zafêr bo.

Qezaya Madenî ya Xarpêtî de di kesê bînî binê enkazî ra ameyî vejîyayene. Dewa Gezîn de 12 saete badê erdlerzî cînîyêka digane binê enkazî ra ameye xelisnayene.Taxa Mustafa Paşa dî zî di kesî ameyî xelisnayene.

Goreyê AFADî merkezê Xarpêtî de 4 bînayî rijîyayî, 21 kesî merdî û 1030 kesî birîndarê. Ame vatene ke rasteyê teyara şuxulyeno. Şebekeyê xeberdayîşî  wextêko kilm birya nika problem çîn o. Problemê elekrîk û dogalgazî çareser bi. Trenê herême ancîyayî îstasyonanê nêzdîyan.

Hetê bînî ra şarê bajarî ra ame waştenê ke bi wesayîtanê xo yê şexsîyan mevejîyê trafîkî. Rîyê trafîkî ra wesayîtê mudaxelye lezkanî nêeşkenî bixewtî.

Partîya Demokratîke ya Şaran (HDP) heyetêk şawitê Xarpêt ke cayê qewimîyayîşî de cipersayîş bikerê.

Prof. Dr. Nacî Gorur vat mi derheqê erdlerzê Xarpêtî konferansî dayî  hîşyarî kerdî la çi heyf o ke vera naye çîyêk nêame kerdene.

Berpirsîyarê dewleta tirke zî sey her wextî krîzî xirab îdare kenê. Serekê Kizilayî Kerem Kinik badê erdlerzî Twîtteer ser ra paştdayîşê pereyî waşt dima ra mesajê xo esterit.

Serekê Pêroyî yê CHPyî Kemal Kilidaroglu vat wextê AKPyî de 17 serran seba  Îstanbul  vera erdlerzî zixm bo 36 mîlyar dolar ame pêser û wina persa bi ‘‘nê pereyî ça de yê?‘‘

Wezîrê Çimeyanê Enerjî û Tabbî  Fatîh Donmezî derheqê erdlerzî de vat her çî wa dewlete ra mepawîyo. Wa hemwelatijî zî biney hîsdar bê.