Krîzê ekonomî roje bi roje tesîrê xo zêde keno û derbeyanê giranan dano esnafanê Sûrî yê Amedî ro. Grûbêka esnafanê Sûrî rîyê îflasî ra derebeyê xo ronayî û dikanê xo girewtî. Êyê ke mendê zî vanê ke ê hendî nêeşkenê kiryaya xo bidê. Esnafan ard ziwan ke hendî bazar vinderto û nêeşkenê heqê fatûrayanê xo bidê.

Esnaf Huseyîn Amaratî ard ziwan ke o esnafo 45 serrî yo û çîyo ke ê 4 serranê peyênan de dîyo qe demêk nêdîyo. Amaratî vat ke rîyê polîtîkayanê hukmatî yê şerî ra krîzê ekonomî her ke şino xorî beno û wina qisey kerd, „Bazar de pere çino, hukmatî her çîyê xo dayo şerî ser û paştîya esnafan şikita. Demê Îdareyanê Xoserîye de hukmatî qeza raşanaye û tu hetkarî nêda şarî. Hîrê dikanê mi estbî, mi înan ra di hebî girewtî. Nika ez nê dikanî zî roşena, çew nêherîneno. Ez nêeşkena kîrya û deynanê xo bidî. Sebebo bingeyên ê krîzî hukmat o, hukmat nêeşkeno welatî rayra bero. Ma îflas kerd, polîtîkayê şerî yê hukmatî bi ma da îflaskerdene. Ma dewrê tewr xirabî ciwîyenê.“

 Omer Canbeyî zî ard ziwan ke 4 serrî yo esnaf tengasîyanê zaf pîlan dir têrî mendo û no vat, „Ez Sûr de 35 serrî yo esnaf a, heta nika mi krîzêko wina xorî nêdî. Ma sey esnafî halêkê feqîr û perîşanî de yê. Ma heme ameyê dereceya girewtişê derebeyan. Mi dikan serê sibayî akerd, saete bîya 13.00 la hewna mi sifteh zî nêkerdo.“

'Ganî Şer Biqedîyo‘

Azîz Dayanî zî da zanayene ke feqîrî Tirkîya de resaya dereceya tewr core û wina dewam kerd, „Krîzê ekonomî hîrê serrî ra vêşêr o esto û her ke şino hîna beno xorî. Kurdistan de bi serran o şerêko leymin yeno rayraberdene. Seba ke nê erdan rê aşitî û demokrasî nêro hêzê tarîyî dewre de yê. Prosesêk ke hende feqîrî esta, dergkerdişê şerî bêmana yo. Ma qasê xo ciwîyayî la do azê dimayê ma se kerê. Ganî şer biqedîyo.“

 'Mi Îflas Kerd‘

Dayanî bale ante ser ke menga dîyin a o nêeşkeno heqê kirya, ceyran, awe û kartê kredî bido û vat, „Ez amîya halê îflasî, seke şima vînenê çîyêk dikan de nêmendo û ez nêeşkena çîyêk biherînî. Ez do heta menga ke bêro dikanê xo bigêrî.“

'Ganî Hukmat Bêro Vurnayene‘

Hasan Bayramî zî ard ziwan ke karê înan qe rind nêyo û vat, „Selahîyetdarî vanê krîz çino. Labelê bazar xo ramojneno. Tirkîya de hêzê herînayîşî kewto. Merdimî kêfweş nêyê. Ameyoxê ekonomîya Tirkîya rind nêyo. Ma umîd kenê ke do ekonomî bêro rindkerdene. Ma xo aciz bikerê zî çîyêk nêvureno. Seba ke krîzê ekonomî şiro ganî hukmat bêro vurnayene. Ganî tena îdare nêvurîyo, îdare bidîyo destê şarî. Polîtîkayê înan rast nêyê. Na yewe ra krîzê Tirkîya hîna beno pîl.“