Guvene: Ma do çi rey bêumîd nêbê, bêguman ma do bi ser bikewê!

Hemsereka KCD’yî Leyla Guvena ke cewab da serekê tepişteyî yê Òmnium Culturalî Jordî Cuîxartî vat ke ê do çi rey umîdê xo nêkerê vînî û vat helbet do roja şaranê bindestan zî bêro.

Hemsereka KCD’yî Leyla Guvana ke 133 rojî yo grevê vêşanîye de ya cewab da mektûba serekê organîzasyonê cimatê sivîlî yo Katalan o bi nameyê Òmnium Culturalî Jordî Cuîxarto ke seba ke xoserbîyayîşî wazeno erzîyayo zîndan.    

Seba hemsereka Kongreya Cimatê Demokratîkî (KCD) û parlamentera HDP’yî ya Colemêrgî Leyla Guvena ke semedê wedartişê tecrîdê serê Rayberê Şarê Kurdî Abdullah Ocalanî 133 rojî yo grevê vêşanîye yê bêdem-bêagêrayîşî de ya çalakî û peyamê paştîdayîşî dewam kenê.  Di rojî verî serekê organîzasyonê cimatê sivîlî yo Katalan ê bi nameyê Òmnium Culturalî ke xoserbîyayîş wazeno û naye ra erzîyayo zîndan seba ke bireso Guvene mektubêk nûştebî.  Guvene Cuîxartî rê bi mektûba akerdî cewab da.

MA SEBA EDALETÎ MUCADELE DANÊ

Mektuba Guvene ya ke resaya destê ANF’yî wina ya (mîyan sernameyî aîdê ma yê):

“Hemrayê min o ercaye,

Mektuba ke to şirawite mi a girewte. Rixmo ke şima şertanê zîndanî de yê zî şima nê hîsê xo yê hêzdarî resnayê mi ez zaf spas kena, zerrîya şima weş û geş bo.

Dostê min o ercaye,

Seke Hypatîa vano ‘Ma ra çew nêmaneno çewî.  La çîyê ke ma resnenê pê çîyanê ke ma yewbînan ra dûrî danê ra vêşêr ê. Ma heme bira yê.’ Ma yanî Kurdî û Katalanî her çend ziwanê ma, nasnameyê ma û bi pêroyî coxrafyaya ma ya ke ameyê qedexekerdene yewbînan ra cîya bê zî, ma dejan de, hêrs de, serewedaritiş de, xoverdayîş de û cesaret de şarê ke benê yew perçe yê. Nîetzsche vano ke “Şore tenayîya eşq û afernayoxîye. Wextêkê dergî ra dima do edalet to teqîb bikero.” Ma zî seba ke edalet bêro erdanê ma mucadele danê. Eke welatê ma de edalet bibîyêne şima û embazê şima yan zî bi hezaran sîyasetmedarê Kurdan ê ke tîya yê do rîyê fikranê xo ra tepişte nêmendêne. Mi par seba ke vatibi operasyonê dewleta Tirkî yê hemverê Rojawanî û Efrînî ‘îşxalkarî’ ya ez amîbîya tepiştene. Heta fehmo tekperwer ê netewe-dewlete estbo do mucadeleyê ma zî dewam bikero.

SERREWEXTÊK ŞI LA Ê HEMA ZÎ BÊVENG Ê

Hemrayê min o ercaye,

Seke şima zî zanê ma yanî ez û bi hezaran embazê mi ma grevê vêşanîye de yê. Rixmê heme cehdan de ma nêeşkayî vengê xo biresnê. Seba ke sewbîna rayîr nêmendibi ke ma bêqhuqûqîyanê dewleta TC’yî qal bikerê ma muracatê nê rayîrî kerd. Bi nê rayîrî ma waşt ke her kes tecrîdo ke serê Abdullah Ocalanî de yeno bicaardene bêro zanayene û sazîyê mîyanneteweyîyî bikewê têgêrayîşêk mîyan. Rixmo ke ma grevê vêşanîye de serrewextêk ra vêşêr xo ra dima verda tecrîd dewam keno û selahîyetdarî hewna zî hemverê waştişê ma de bêveng ê. Wina aseno ke ê ma ra bedel wazenê. Halbû ke ma no bedel girewtibi xo ser û wina kewtîbî rayîr.

ZULKUFÎ BÊVENGÎYE RÊ CEWAB DA

Tam zî hemverê na bêvengîye de embazêk min o ke zîndan de bi, tepişteyo sîyasî Zulkuf Gezenî cewab da. Zulkuf ciwanêko Kurd bi ke qezaya Sûrî ya Amedî de mîyanê şerî de amebi dinya. Serra 2007 de amebi tepiştene û ci rê cezaya heta bi heta ya girankerdî, yanî heta emrê ci bibo zîndan de bimano amî dayene. 12 serrî bi ke zîndan de bi. Zulkufî zîndan de çalakîya fedaîye viraşte ke na bêvengîye bixeripno. Hemrayê ma Zulkufî zî sey heme qehremananê ma zerrîya şarê ma de cayê xo girewto. Klara Zetkînî vana ke ‘Mergê şorişgêrêk çi rey bedenkî nêyo. Şorişgêrêk key mireno şima zanê? Gama ke fikrê ci bimirê mireno.’ Ma do fikrê embazanê xo yê ke seba ê fikran canê xo dayê biresnê serkewtişî.

MA DO BÊHUQÛQÎYE QEBÛL NÊKERÊ

Tecrîd sûcêkê merdimîye yo. Ma do na bêhuqûqî çi rey qebûl nêkerê. Heqê serdestan çino ke seserra 21’ine de şarê ma ra vacê senî biciwîyê. Ma do bi îradeyê xo yê azadî îdealanê xo bica bîyarê.

NAMEYÊ ERDÊ MIN Û ZIWANÊ MI QEDEXE YO

Erdê ma yê ke 100 serre verî bi pêameyîşê Sykes-Pîcotî bi çar perçeyan ameyî perçekerdene bi gonî ameyî awedayene.    Tena ma Kurdê ke Tirkîya de yê 30 mîlyon ê la ma çinê yenê hesibnayene. Na seserra 21’ine de ke averşîyayîşê globalkîyî virazênê hewna zî nameyê erdanê mi û ziwanê mi qedexe yo. Şima eşkenê bifikrê? TBMM’yo ke ez zî endama ci ya de qiseykerdişê Kurdkî û vateyê Kurdistanî qedexe yo. Kesê ke nê çekuyan şuxulnenê derheqê înan de bi ‘propagandaya organîzasyonî’ dewa yena akerdene.

MA DO UMÎDÊ XO NÊKERÊ VÎNÎ

Birastî lazimî çina ke ez nînan şima rê binûsî. Çunke, şima zî bêhuqûqîyanê ke arîyenê ma sere ciwîyayî û ciwîyenê. Ez seba paştdayîşê şima reyna spas kena. Seke birêz Ocalan vano “Umîd serkewtişî ra ercayêr o.” Seke nê vateyî ra zî fam beno ke ma do çi rey umîdê xo nêkerê vînî.

DO ROJA BINDESTAN ZÎ BÊRO

Ma zanê ke dinyayêk ke tede paradîgmaya demokratîk, ekolojîk, azadperwer a cinîyan bibo serdeste û her kes cuya xo bi azadîye biciwîyo mumkun a.  Ez bi nê hîsan umîd kena ke wextêkê tewr nizdî de şima do biresê azadîya xo û şima rê silam û heskerdişanê xo şirawena. Seke qehremanê şarê xo Baby Sandsî zî vatibi ‘Do roja ma zî bêro.’  Do roja heme şaranê bindestan ê dinya bêro. Bêguman ma do bi ser bikewê!”