Guvene: Yewîya neteweyîye zehmet a la mumkun a

Hemsereka KCDyî û Wekîla HDPyî ya Colemêrgî Leyla Guven pare kerd ke her çiqas Kurdîstan parçebîyaye yo û zorîyê tewiranê cîyayan ê sîyasîyan estbê zî caardişê yewîya neteweyîye mumkun û şert o.

Hemsereka Kongreya Komelê Demokratîkî (KCD) û Wekîla HDPyî ya Colemêrgî Leyla Guven derheqê Yewîya Neteweyîya Kurdan de ANF reyde qisey kerd û tay ercnayîşî kerd.

Beşêkê ercnayîşê Leyla Guven wina yo:

''Birêz Ocalanî her tim yewîya neteweyîye ardêne ziwan û bi pêşnîyazêkî waşt ke Kongreya Neteweyî ya Kurdan bêra awankerdene. Na babete hetê Ocalanî ra bi hawayêkê cidîyî ameyêne ercnayene. Ocalanî Barzanî û Talabanî ra mektubêk erşawit û eşkera kerd ke seba ke Kongreya Neteweyî ya Kurdan bêra awankerdene xebatî bêrê kerdene. Serra 2013î de bi pêşnîyazê Ocalanî xebatî ameyî kerdene û zaf kurdî zî tewrê nê xebatan bîyî. Labelê hetê destêko ke her kes zaneno destê kamî yo ra xebatî ameyî astengkerdene. Rewşa ma nika winasên a. Bi pêşnîyazê Birêz Ocalanî heta asta kongre ame û delege ameyî mojnayene. Kifş bî ke ma eşkenê yewîya xo awan bikerê.

Bi heman ruhê yewîye ma ra yeno waştene ke ganî yewîya neteweyîye bêra awankerdene. Seserra 21. do teqez biba seserra kurdan. Amed de Vakurê Kurdîstanî de îtîfaqê kurdan esto û ma do nê îtîfaqî bikerê îtîfaqê Kurdîstanî. Canêradişê yewîya neteweyîye kêmasîya ma ya pîl o. Wexto ke Başûr de referandum estbi Tirkîya Başûr rê gef wend. Ma vera naye nêrazîbîyayîşê xo mojna Tirkîya.Eke yewîya kurdan estbîyêne rewşa yewna qayde bîyêne. Ganî ma parçe parçe ney bi hawayêkê yewîya neteweyîye nêrazîbîyayîşê xo bimojnê. Pêro vatişî ganî yewîya neteweyîye ser o bêrê pêser. Na rewşe de hewcedarîya yewîya neteweyîye esta. Ganî partîyî rêxistinî vatişanê cîyayan nêkerê. Vatiş ganî bibo vatişê Kurdîstanî. Coka her wextî ra zêdêr hewceyê ma bi yewîya neteweyîye esto.

Kampa Multecîyan a Mexmûrî çend mengan ra nata binê ambargoyî de ya. Hukmatê Başûrê Kurdîstanî naye keno. Ma seba na rewşe şikîyaye û xemgîn ê. Eke yewîya neteweyîye estbî ma hîna baş yew têkilî nayêne ro û berpirsîyaranê herême rê vatêne şima se kenê? Na kampe binê sîwana Neteweyanê Yewbîyayeyan de ameye awankerdene. Şarê ma Mexmûr de meseleyêka cidîye anceno. Seba çareserkerdişê na mesele reyna yewîya neteweyîye yena ma vîrî. Ewro ma bi vengêkî eşkenê vengê xo dinya de vila bikerê. Ganî ma pêro pîya binê yewîya neteweyîye de bêrê pêser."