Operasyonê qirkerdişî yê sîyasîyî yê dewleta tirka faşîste yê vera şar û sîyasetmedaranê kurdan zêdîyenê. Vizêr operasyonê vera KCDyî de 44 kesî ameyî destbendkerdene û çarçeweya eynî tehqîqatî de Şirnax, Êlih, Wan, Îzmir, Adana û Îstanbul de bi desan keyeyî ameyî sereştene. Parlamentera Partîya Demokratîke ya Şaran (HDP) ya Amedî Semra Guzel derheqê babete de ANFyî rê qisey kerd.

Guzele vat: ''Hukmat bi heme hêzê xo û zaf bihet hêriş keno. Hêrişê vera HDPyî, qeyûmî, hêrişê vera goran, wedartişê destnêpadayîşî, sey hedef ramotişê rayraşîyayîşê demokrasîyî nê heme leteyê cîyayî yê hêrişan ê. Reyna hetê bînî ra vera înanê ke kişta ma de vindenê zî hêrişî yenê kerdene. No zî leteyo bîn ê konseptê şerî yo. Operasyonê Başûrî, xîretkerdişê cabîyayîşê Zinê Wertê heme yewbînan rê pabesteyê. Hêrişê hewayî de tutanê ke kaykerdêne hedef girewtî. Reyna Kobanê de hîrê cînîyê sîyasetmedarî ameyî qetilkerdene. Kobanê bi têkoşînê cinîyan destê çeteyan ra ameye girwetene. Hêrişê vera Kobanê de têkoşînê cinîyan sey hedefî yeno girewtene.

No demê Korona de herinda xebata semedê weşîya şarî de bi hêrişan şinê şarî ser. Ma do xebata sîyasetê demokratîkî rê dewam bikerê. Ma do hem hemleya xo ya  ''cinîyî her ca de yê'' hem zî xebata hîrê aşman a ke bi rayraşîyayîşê demokrasî dest pêkerd rayra berê.No nîşano ke ûmidê ma yê haştîye nêqedîyayî û têkoşînê ma do dewam bikero. Ganî hetê demokratî bêrê têhet û vera zîhnîyetê faşîstî hêzê xo bikerê yew. Ê çend hêriş kenê ma xurtêr benê. Hukmat seba ke zano ma do peynîya înan bîyarê, hêrişê ma keno. Zano ke stratejîya HDP û kurdî do înan bifînê bin. Coka hêrişê înan keno. La no zîhnîyeto faşîst do pê destê şarî bêro qedînayene.

KCD gama ke merhaleya ronayîşî de bî parlamenterê AKP û mustaşê MÎTî zî tewrê kombîyayîşanê ci bîyî.  Nê xabate demê haştîye bî. Ewro hêrişê vera KCDyî nêzdîbîyayîşê înan ê semedê çareserî zî ramojneno. Ewro huqûq xoser nîyo, goreyê waştişê kesêkî têgêreno. Qerarê hukmî hetê hukmatî ra yenê girewtene. Hukmat wazeno nê demî de sîyasetê demokratîkî werte rawedaro. La ma do rixmê heme hêrişan peyser game meerzê û têkoşînê xo xurtêr bikerê.''