Hemserekê HDP’yê Çewlîgî Veysî Kayayî vat AKP’yî bi açarnayîşê bajawanîye bajaro qedîm ê Çewlîgî açarnayo cayê rantî û şarê ma mexdûr kerd. Kayayî ard ziwan ke Çewlîg AKP’yî ra aciz bîyo û bi zerrîya germe HDP’yî virare keno.
Bajarê Çewlîgî yê Vakurê Kurdistanî yew bajaranê tewr xasek, wayîrê xozaya xaseke, dewlemendîya bawerîyan ra yew o û bi dîyalektanê Kirmanckî û Kirdaskî bajarêko dewlemend o. Çewlîg bi awa xozayî ya ke kerreyan ra yena, ko û xozaya xo ya xaseke zerrîya hemeyê Kurdistanijan ver bi xo anceno. Bi nizdbîyayîşê weçînitişê îdareyanê herêmkîyan ê 31’ê Adare Partîya Şaran a Demokratîke (HDP) Çewlîg de lez da xebatanê xo, kuçe bi kuçe, mehla bi mehla şarî dir yena têhet. Hemserekê HDP’yî yê Çewlîgî Veysî Kayayî xebatê weçînitişî yê cayîyî ANF’yî rê ercnayî.
‘Çewlîgijî hemverê AKP’yî de bireaksîyon ê’
Kayayî da zanayene ke bajaro qedîm ê Çewlîgî very hîna xasek bi û wina dest bi qiseykerdişê xo kerd: “AKP’yî bi açarnayîşê bajawanîye bajaro qedîm ê Çewlîgî açarnayo cayê rantî û şarê ma mexdûr kerd. Kayayî ard ziwan ke Çewlîg AKP’yî ra aciz bîyo û bi zerrîya germe HDP’yî virare keno. Çewlîg de coşê 7’ê Hezîrane esto. Hemverê polîtîkayanê AKP’yî de reaksîyonê pîlî estê. Eksê nê de seba HDP’yî zî virarkerdişêk esto. Kuçe û mehlayê ke ma şinê ma nê vînenê. Verî rîyê zulmê îqtîdarî ra êyê ke nêftarayêne silam bidê estbî. La nika ma vînenê ke no ters ameyo şikitene. Naye ra ez şarê Çewlîgî ra wazena ke ma bi ser bikewê. Ma do Çewlîg de bi ser bikewê û Çewlîg ê ma yo.”
‘Çîyo ke AKP bido şarî çino’
Kayayî bale ante ke AKP’yî bi îttîfaqê MHP’yî welatî fînayo mîyanê xetemîyayîşêk û wina vat: “Çewlîg de çîyo ke AKP bido şarî çino. Bi îttîfaqê xo yê MHP’yî dir welat fînayo mîyanê çemberêk. AKP very zî nijadperest bi û ewro zî MHP’yî reyde merkezperest a. Hişmendîya şaredarîye ya AKP’yî kultur û vîzyonê bajarwanîye ra dûr a. Herinda ke butçe goreyê îhtîyacîyanê şarî xerc bikero, nîmeyê ci dana hetgêranê xo. Her cayê Çewlîgî ra awe pijqêna, la birnayîşê awa şarî şar aciz kerdo. Şar bêkar o û krîzê ekonomî sereyê xo girewto şino. Gama ke ma şarî dir yenê têhet, şar vano rîyê polîtîkayanê hukmatî ra ma HDP baş fam nêkerdo. Labelê êdî wext ameyo, kesê ke Çewlîgî aciz kenê ma do înan Çewlîg ra vejê.”
‘Çewlîg de ma do berê zulmî bişiknê’
Kayayî peynîya qiseykerdişê xo de ard ziwan ke bi germayîya şarê Çewlîgî ê do 31’ê Adare de Çewlîgî AKP’yî ra bixelisnê û wina vat: “Eke Çewlîg de AKP muracatê rayîranê zordaran nêkero nika ra ma serkewte yê. 25’ê menge de ma mîtîngê xo virazenê û ma hemeyê şarê xo dawetê govenda azadîye û şikitişê berê zulmî kenê.”
