KCK: Dejê şarê Lubnanî dejê ma yo

KCKyî seba teqayîşê 4ê tebaxe şarê Lubnanî rê serweşîye waşte û vat: ''Ma zerrîye ra dejê şarê Lubnanî pare kenê. Dejê înan dejê ma yo.''

Hemserekîya Konseya Rayberdişî ya KCKyî derheqê teqayîşê 4ê tebaxe yê Lubnanî de eşkerayîyêke weşanaye.

Eşkerayîya KCKyî wina ya:

''Teqayîşê 4ê tebaxe yê lîmanê Beyrût-Lubnanî bi sebebê mergê xeylêk merdiman û birîndaran. Ma şarê Lubnanî rê serweşîye wazenê, mergan rê rehma Homayî wazenê, birîndaran rê şîfaya xeyre wazenê. Ma dejê şarê Lubnanî zerrîye ra pare kenê. Dejê înan dejê ma yo.

Lubnan cayanê tewr rindan ê Rojhelatê Mîyanênî û welatanê ereban ra yew o. Lubnano ke tede ereb, arman, sûryan, kurd, durzî û bawerî û neteweyê cîya-cîyayî ciwîtenê, cografyaya bawerî û şaran a. Lubnan hetê kultur û hunerî ra Rojhelatê Mîyanênî de mîsalêk o. Coka dejê ci dejê pêro merdimîye û dejê Rojhelatê Mîyanênî yo. Şarê kurdî zî naye ra zaf kewto ey verî.

Têgêrayîşê ma yê azadîye û şarê kurdî perwerê Lubnanî yê. Ma Lubnan sey welatê wayûbirayê kurdan vînenê, pêro kurdî Lubnan sey welatê xo vînenê. Nê rojanê zoran de ma hetê şarê Lubnanî de yê. Ma pê bawer ê ke kurdê Lubnanî seba pêştişê dejanê Lubnanî wezîfeyê xo do bîyarê ca.

Şarê Lubnanî senî ke heta nika heqê dejan ê giranêran ra ame, do heqê nê dejî ra zî bêro. Seba ke şarê Lubnanî nê dejan ra derbaz bibê dostê Lubnanî do hetkarîya madî û manewîye bikerê.Ma pê bawer ê ke şarê erebî zî na babete de mesuldarîya xo do bîyarê ca.

Ma reyna şarê Lubnanî rê ke têkilîya ma ya qadîme û xorine esta, vanê ke wa kefaret bo û ci rê serweşîye wazenê. Ma hêvîdar ê ke şarê Lubnanî do dejanê xo pişê tê û reyna sey gewherê Rojhelatê Mîyanênî abigêro rojanê xo yê beriqîyayeyan.''