Hemserekîya Konseya Rayberdişî ya KCKyî derheqê hêrişanê dewleta tirke yê vera Silêmanî de eşkerayîyêke daye.

Eşkerayîya KCKyî wina ya:

''Dewleta tirke hêrişê ê hêzan kena ke ci rê îtaat, hemkarî, paştdayîş nêkenê. Coka nika zî hêrişê Silêmanî kerd. Wezîrê Karanê Teberî yê Tirkîya vat ke PKK Silêmanî de aktîf o û gef wend ke ê do sey Mexmûr û Şingal do bido Silêmanî ro zî. Faşîst û dişmenê kurdan Devlet Bahçelîyî zî bi hawayêkê eşkerayî Silêmanî sey hedef mojna. Çunke vatişê 'PKK Silêmanî de aktîf o' têna sebebê bahaneya hêrişan o.

Silêmanî û şarê ci tim fikranê neweyan rê akerde bîyî. Çunke Silêmanî de tim huner, edebîyat û kulturî aver bîyî. Hunermend û sîyasetmedaro ercîyaye Îbrahîm Ahmed embazêko nêzdî yê Rayber Apo û PKKyî bi. Mam Celalê rehmetîyî zî heta peynîya emrê xo têkilîya xo ya bi PKK û Rayber Apoyî dewam kerde. Nê nêzdîbîyayîşî bîyî sebeb ke şarê Silêmanî û Başûrê Kurdîstanî zî nêzdîyê PKK û Rayber Apoyî bibê. 

PKK û YNK zî esasê têkilîya mabênê Mam Celal û Rayber Apoyî ser o tim wayîrê nê mîrasî vejîyayî. Ge ge mabênê YNK û PKKyî de tay meseleyî qewimîyayî zî tim no mîras pawit. Ma ewro zî bi heman hewayî nêzdîyê na mesele benê.

Dewleta tirke pê teda wazena ke PKK û YNK bîyarê têvera

Ma zanenê ke dewleta tirke pê teda wazena ke bi taybetî YNK û PDK partîyê sîyasî yê Başûrî vera PKK şer bikerê. Dewleta tirke kêfweşîya xo ya seba têgêrayîşê PDKyî her tim ana ziwan. Hêrişê vera Silêmanî mojnenê ke YNK goreyê vatişê ci tênêgêreno. Pê eşkerayîyanê winasênan  kenê ke PKK û YNK bêrê têvera. Hetê bînî ra sey hêrişê vera Şehîd Cemîl û Şehîd Demhatî Silêmanî de hêrişanê xo normalîze bikerê.

Tewr peyên hêrişê vera bajarekê Şarbajêrî yê Silêmanî de tay kesî şehîd û birîndarî bîyî. Ma nê şehîdan bi rêzdarî yad kenê û birîndaran ra şîfaya xeyrêne wazenê. Eşkera yo ke dewleta tirke naye ra pey Silêmanî do hedef bikera. Seba nê hêrişan zî sempatîya ciwan, cinî û şarê Başûrê Kurdîstanî ya seba Rayber Apo û Têgêrayîşê Azadîye yê Kurdîstanî sey sebeb do bimojna. 

Sey çar parçeyanê Kurdîstanî bêguman Silêmanî û Başûrê Kurdîstanî de zî tay kesî estê ke xeta Rayberîye û PKKyî ra hes kenê. Mîyanê roşnvîr û sîyasetmedaranê Başûrê Kurdîstanî de zî xeylêk dostê PKKyî estê ke şaîr Şêrko Bêkes zî nînan ra yew o. 

Dewleta tirke do nêeşka ma bîyara têvera

Têkilîya ma ya bi YNKyî tim esasê dostî û wayûbiratîye ser o bîye. Ma zanenê ke YNK zî seba ma wina fikirîyeno. Teda û hêrişê dewleta tirke do nêeşkê ma û YNK bîyarê têvera. Şarê Silêmanî pê tewirê xo, têkoşînê xo do cewabê hêrişanê dewleta tirke bido.

Eşkerayîyê Wezîrê Karanê Teberî yê Tirkîya Çavuşogluyî pê armancê hêrişkerdişî ameyî dayene. Ma pê bawer ê ke şarê kurdî û hêzê sîyasîyî vera nê hêrişan hîsger bibê û nê kayê înan pûç bikerê. Dewleta tirke û Çavuşoglu se kenê wa bikerê do nêeşkê bikerê ke kurdî vera yewbînan şer bikerê. Sere de şarê Silêmanî şaro welatperwer ê Başûrê Kurdîstanî pê tewirê xo do nê kayî pûç bikero.''