Kemalbaye: Weçînitiş sey referandûmêk o

Parlamentera HDP’yî Serpîl Kemalbaye vat, dimayê weçînitişê 23’ê Hezîrena ra do hemverê karker û kedkaran de zextêko giran bêro kerdene û vat, ganî weçînitiş de goreyê na yewe tewir ramojnê.

Parlamentera HDP’yî Serpîl Kemalbaye muhîmîya weçînitişanê Stenbolî yê seba karker û kedkaran ANF’yî rê ercna. Kemalbaye da zanayene ke weçînitişê Stenbolî yê 23’ê Hezîrane alelade nêyê û vat ke Tirkîya wextêko derg o zereyê krîzê demokratîk, sîyasî û ekonomîkî de ya û rejîmo otorîter keno ken ê krîzî binimno.

Kemalbaye bi vîr vist ke krîzî tewr zaf karker û kedkaran ser o kerdo û vat karkerî seba ke bieşkê vengê xo bidê şinawitene ameyê dereceya xo vêşnayîşî. Kemalbaye ard ziwan ke çi şexsî bê û çi zî organîzasyonî bê karkerî zereyê serewedartişêkê pîlî de yê û vat, “Karkerî nika zereyê prosesêk de yê ke maneno wextê dimayê derbeya leşkerî ya serra 1980’î. Pîya bi xebetnayîşê bê asayîşê karî, dewlete sendîkayî tasfîye û bêtesîr kerdî. Her ke karkeran organîzasyonê xo vînî kerdî bi şertanê giranan ê sey cehnemî rê ameyî mehkûmkerdene. Seba ke sendîkayî nêeşkenê waştişanê karkeran rê bibê cewab, karkerî bi xo vêşnayîşî yan zî xo sere vînçan ra eştişî gef wanenê. Kedkarê umûmîyî yê ke bi qerarnameyan kar ra ameyê vetene vêşan yenê verdayene. Bêkarî zî resayê a nuqte ke bi xokiştişî nê halî şermezar bikerê.”

Kemalbaye vat îqtîdar qîmê xo bi naye zî nêano û nika binê nameyê paketa ekonomîye de keno ke fatûrayê krîzî karker û kedkaran rê bibirno. Kemalbaye bale ante serê bêorganîzebîyayîşê karkeran û lazimîya ke bi mucadeleyêkê xurtî esta û vat, “Dimayê 23’ê Hezîrane ra do hêrişê xeylî giranî bêrê kerdene û ganî merdimî nê hêrişan rê amade bibê. Ganî karker û kedkarî weçînitiş de na çarçewaye de tewirêk ramojnê, naye ra weçîitiş sey referandûmêk o. Nê weçînitişî de ganî amac binfînayîşê îqtîdarê faşîstî yê AKP-MHP’yî bo. Ganî halo wêran ê cimatkî yo ke rîyê krîzê ekonomîkî û sîyasîyî ra vejîyayo raste ra bêro wedartene. Loma Stenbolijî do vernîya xurtbîyayîşê linga herêmkîye û sîyasîye ya bloka faşîste bigêrê û bi binfînayîşê bloka faşîste îmkananê demokrasîyî biafernê.”

Kemalbaye tewr peynî de ard ziwan ke HDP do sey weçînitişanê 31’ê Adare do 23’ê Hezîrane de zî hesabanê mendebîyayîşê îqtîdarê faşîstî bin fîno.