'Komel bi akerdişê beranê Îmraliyî aram beno'

Avûkat Mesut Beştaşî ard ziwan ke caardişê Îmraliyî huqûqê zereyî û mîyanneteweyî de çin ê û vat: ''Bi akerdişê beranê Îmraliyî şarê Tirkîya do bikewo mîyanê aramîye. Herême de semedê şerî û alozîya nikayêne polîtîkaya tecrîdî yo.

Seba şiknayîşê tecrîdî rayberîya Hemsereka KCDyî Leyla Guven de grevê vêşanîye ame kerdene û çalakîye bi serkewtişî qedîyaye. Pêvînayîşo peyên 7ê tebaxa 2019î de ame kerdene. A roje ra nata seba pêvînayîşî avûkatan zaf reyî muracat kerd la cewabêk nêgirewt. Avûkat Mesut Beştaşî derheqê tecrîdê vera Ocalanî de ANF reyde qisey kerd.

Beştaşî vat: "Îqtîdar bi isrardarîye tecrîd rê dewam keno û no tecrîd keyfî yo. Çi suc keno wa bikero heqê pêro tepişteyan esto ke pêvînayîş bikerê. 20 serrî yo ke tecrîd dewam keno. Ge ge beno şenik ge ge beno giranêr. Tecrîd sucê vera merdimîye yo.Heta ke mesela kurdan çarser nêba eşkera yo ke tecrîd zî do dewam bikero. Birêz Ocalan rayberê şaran o. Vatişê Birêz Ocalanî benê semedê aramîye û meseleyan çareser kenê. Semedo tewr girîng ê girankerdişê tecrîdî zî no yo. Nê prosesî de dewlete nêwazena bi hawayêkê demokratîkî mesela kurdan çareser bikera.Tecrîd têna vera Îmraliyî ney vera komel û şarî zî yeno kerdene. Seba çarekerdişê meseleyan xîretêkê dewlete çin o û herême de pêro rayîrê haşitîye, aramîye û sîyasetî ameyî girewtene. Tecrîd çend xorin bo şer zî hende xorin beno

Tecrîd bi hawayêkê keyfî şêxsî yeno kerdene. Zaf zelal û eşkera yo ke tecrîd sîyasî yo. Cezayêk zî nêeşkena biba semedê tecrîdî. Huqûq de qanûnî seba şexsan nênê viraştene la ma vînenê ke her roje seba Îmraliyî qanûnê neweyî yenê viraştene.Eke berê Îmraliyî bêrê akerdene seba muneqeşeyan bingeyî do bêrê awankerdene û prosesê şerî do biqedo. Tirkîya de aramî û haştîye do awan bibê. Tecrîd zerarêkê pîlî dano aramîya Tirkîya. Ganî dewlete seba aramî û rehetîya şarê xo bixebita û tecrîd biqedna. CPT babeta Îmraliyî de goreyê menfaatê xo têgêreno. Ganî wezîfeyê xo bîyaro ca û cayo ke tede heqê merdiman yenê binpaykerdene cigêrayîş bikero."