Serdozgerîya Swêdî menga gulane de da zanayene ke kiştoxê serekwezîrê verênî Olof Palmeyo ke 34 serrî verê cû Stockholm de kişîyabi, Stig Engstrom o. Serdozgerî îfade kerd ke seba ke kiştox merd tehqîqat de zî qefilîya.

Kişîyayîşê Palmeyî seba sûcdarkerdişê Têgêrayîşê Azadîye yê Kurdîstanî yê Swêdî bi gama yewine. Kurdan rê tehqîqatî ameyî akerdene, kurdî ameyî destbendkerdene û tepiştene. Dima zî PKK ame tororîzekerdene.

Endamê Komîteya Rayberdişî ya PKKyî Duran Kalkanî ard ziwan ke kişîyayîşê Palmeyî xeylêk tesîrê Komploya Mîyanneteweyî ya vera Têgêrayîşê Azadîye yê Kurdîstanî kerd. Kalkanî mesele seba rojnameyê Yeni Ozgur Politika ercnaye.

Qiseykerdişê Kalkanî ra beşêk wina yo:

''Mehkemaya Swêdî dosyaya kişîyayîşê Palmeyî qefilnaye. Na bêçaretîya înan a. Senî Swêd, dewletê dinya û rêxistinê îstîxbaratî nêeşkenê nê serebûtî roşnî bikerê? Senî bire dîyaye ke mêriko ke xo kişto, kiştox o? Çira no çi verê cû nêame rişnîkerdene? Persê winasênî zêde yê. Nêbeno ke dewaya Palmeyî wina bêra qefilnayene.

Serdozgerê Swêdî Hans Holmerî tim seba na dewa kurdî kerdî sûcdar. Nêwaşt ke mesele roşnî biba, eqsê ci mesele kerde mîyan. No cînayet zî dosyaya ci zî plankerde yê. Ne Swêd ne zî Ewropa pê vatişê 'Dosya gêrîyaya' nêeşkenê tesîrê kişîyayîşê Palmeyî ra vejîyê. Merdimî her tim do na dewa bipersê.

Nê cînayetî ra dima têna Swêd de nê pêro Ewropa û dinya de vera PKK û kurdan neheqîye ameye kerdene. Sey Swêd Almanya zî no cînayet kerd bahane û vera kurdan û PKKyî hêrişî kerdî. Vatişê înan ê 'Ma îfadeyê 20 kurdan girewtî û kar qedîya' tewirêko cidî nîyo. Nê merdimî senî dest bend bîyî, tepişîyayî? Şima senî eşt keyeyanê înan ser û domanî tersnayî? Şertanê senînan de şima îfadeyê înan girewtî? Ci rê senî teda kerde? Kurdî senî sey barbar, kiştox û hêrişkerî ameyî mojnayene?

No cînayet seba ke kurdî bibê sûcdar hetê welatanê Ewropa ra ame organîzekerdene. Bi nê hawayî waşt ke qirkerdişê vera kurdan wa meşrû bibê. Nê cînayetî ra dima her kes bi hawayêkê xirabî ewnîya kurdan. Komploya Mîyanneteweyîye ya 22 serran pê kişîyayîşê Palmeyî dest pêkerd.

No cînayet polîtîk bi. Palme nêzdîyê Têgêrayîşê Azadîye û bindestan bi. Hetê ekonomîk û sîyasîyê nê cînayetî estê. O çax NATOyî paştî dayêne darbeyan la Palme vera darbeyan bi. Nê hezanê faşîstan û talankeran Palme kerd hedef. Kamî yan zî kaman no cînayet plan kerd? Ganî cewabê ney bêro dayene. O çax Gladioyê Tirkîya Ewropa de têgêrayêne. Mumkîn nîyo ke MÎTê Tirkîya bê Gladio û CIA cinayetêkê winasênî bikero. Merdim eşkeno vajo ke peyê cînayetê Palmeyî de kontragerîlaya Tirkîya esta. Nê cînayetî ra tewr zêde Kenan Evren û TCyê faşîst îstîfade kerd. Nê cînayetî ra dima  paştîdayîşê Ewropa yê seba kurdan û têgêrayîşî destî ra şîyo. Xora armancê cînayetî zî no bi.

Na rewşe seba Swêdî şerm a. Ganî komelê Swêdî ney qebul nêkero û biwazo ke cînayet bêro roşnîkerdene. Ganî Swêd kurdan ra uzrê xo biwazo.