Konferansê Berlînî de 'Tirkîyaya newîye' ameye qiseykerdene

Berlîn de xeylî akademîsyenî, zanyarî, sîyasetmedarî û rojnamegerî derheqê konferansê bi nameyê 'Seba Tirkîyaya Demokratîke Cigêrayîşê Peymana Komelkîye' ameyî têhet. Can Dundarî vat: "Rewî ra ma pabeyê konferansa winayîne bî."

Paytextê Almanya Berlînî de Tirkîya ra xeylî hunermendî, komê etnîkî, rojnamegerî, sîyasetmedarî û akademîsyenî "Seba Tirkîyaya Demokratîke Cigêrayîşê Peymana Komelkîye" ameyî têhet.

Konferanso ke sekreterîya ci Hayko Bagdatî kerd pê qiseykerdişê Hemserekê KCDK-E Yuksel Koçî û Hetkarê Sereko Pêroyî yê Konfederasyonê Yewîyanê Elewîyan yê  Ewropa M. Alî Cankayayî dest pê kerd.

Koçî vat seba ke ê wazenê welatêko demokratîk û têduşt de biciwîyê ameyî têhet. Konferans de Can Dundar, Latîfe Akyuze, Dr. Ahmet Însel, Hatîp Dîcley, Prof. Eser Karakaş, Bêrîvan Aslane, Ergûn Babahan, Gokay Akbulute û Tûrgût Ozerî qisey kerd û seba dewletêka huqûqîye û demokratîke ya Tirkîya pêşnîyazê xo vat. Sîyasetmedaro Kurd Hatîp Dîcleyî vat, "Aqilê Îttîat û Terakkî rayberê AKP-MHP'yî yo rojane bîyo, nê serranê peyênan de sîstemê faşîzmî dest pê kerd." Prof. Dr. Eser Karataşî zî vat seba çareserîya meseleyê Kurdî ganî zafê madeyê qanûnê bingeyênî bêrê vurnayene. Wekîlo verên ê HDP'yî Tûrgût Okerî zî vat, "Ganî no kombîyayîş bi kesanê ke ameyî vengdayene reyde bisinor nêmano, ganî hîna zêde kesî ci ra hayîdar bibê." Akademîsyenanê Haştîye ra Latîfe Akyuze zî vat, "Ma vat ma hemparê nê sucî nêbenî. AKP ame ma ser o, ma înan ra sipas kenî ke ma kerd aktîvîstî. Pê cezakerdişî ma pêro  tewrê muxalîfan bîyî, tewrê bi desan konferansî bîyî."