Kongreya HDPyî dewam kena: Çareserî Ocalan o

Kongreya Tabîyî ya 4. ya HDPyî dewam kena. Kongre de mesajê ''Ocalan çareserî yo'' ame dayene. 28 welatan ra meymanî tewrê kongre bîyî.

Kongreya Pîle ya 4. ya HDPyî dewam kena.

Hemvervatoxê Kongreya Demokratîke ya Şaran (HDK) Sedat Şenogluyî û Hemserekê Kongreya Komelê Demokratîkî (KCD) Berdan OZturkî qisey kerd.

Şenogluyî vat: ''Wezîfeyê ma o yo ke ma meclîsê şaran kuçe bi kuçe, dibistan bi dibistan, dewe bi dewe, qeza bi qeza û kargeh bi karge awan bikerê.''

Ozturkî zî qiseykerdişê xo de îfade kerd ke meseleya kurdan û meseleyê verênî yê Tirkîya bi wedaritişê tecrîdê vera Abdullah Ocalanî çareser benê û vat: ''Birêz Ocalan têna seba şarê kurdî ney seba şarê Tirkîya û Rojhelatê Mîyanênî zî wayîrê hêzêkê girîngî yo. Çareserî Birêz Ocalan o.''

Hemserekanê verênan ê tepişteyan ê HDPyî Fîgene Yuksekdag û Selahattîn Demîrtaşî zî mesaj erşawit kongre.

Yuksekdage û Demîrtaşî mesajê xo de wina vatêne: ''Nika ma zîndan de yê la bizanê ke zerrîya ma kelîyena. Ciwanênê ma xoverdayîş şima ra musayî. Ma dadîyan û cinîyan ra zî tewirê serewedaritişî musayî. Ma çimanê şiman de hêvî dîye. Ma şima ra hes kenê û ma zaf bêrîya şima kenê.''

Sere de Tunus, Fîlîstîn, Urdun, Kibris, Swêd, Şerîaya Rojawane, Fransa, Galîçya, Almanya, Awustralya, Lubnan, Yunanîstan, Bask, Misir, Îtalya, Katalonya, Danîmarka, Norweç, Îngîlîztan, Skoçya, Portekîz, Fînlandîya, Swîsre, Îspanya, Ermenîstan 28 welatan ra meymanî tewrê kongreya HDPyî bîyî. Temsîlarê 30 partîyanê sîyasîyan û temsîlkarê rêxistinanê cinîyan ê Rojhelatê Mîyanênî tewrê kongre benê.

Mîyanê meymanan de Serekê Koma Yewbîyaye ya Meclîsê Parlamentere ya Ewropa Tiny Kox, Sereka Îtîfaqê Azadîye yê Ewropa Lorena Lopez Lacalle, Hetkarê Sekreterê Pêroyî yê Partîya Sosyalîste ya Ewropa Giacoma Filibeck, endamê Koma Sosyalîste û Demokratan a Parlamentoya Ewropa Nîkos Androulakîs zî estê.

Heman wextî de temsîlkarê zaf partîyanê sîyasîyan, sendîkayan, dezgehanê komelanê sivîlan, huqûqî û nuştoxî zî estê.

Birayê Rayberê Şarê Kurdî Abdullah Ocalanî Mehmet Ocalan zî kongre de yo.