Bi vengdayîşê Kongreya Komeleyanê Demokratîkan ê Kurdîstanijan ê Ewropa (KCDK-E) û Têgêrayîşê Cinîyan ê Kurdan ê Ewropa (TJK-E) Almanya, Fransa û Hollanda ra kurdî û dostê înan Bruksel de ameyî têhet û hêrişê îşxalî yê vera Rojawanî protesto kerdî.

Girseyo ke meydanê Porte de Namur de ame têhet pankart akerd û bale ante hêrişê îşxalî yê dewleta tirke yê vera Rojawanî ser. Çalakwanan posterê Rayber Apoyî û beyraqê YPG û YPJyî kiriştî.

Bado ke semedê Şehîdanê Azadîye yê Kurdîstanî rêz ame girewtene  ver bi Partlamentoyê Ewropa (PE) rayraşîyayîş ame kerdene.

Qiseykerdişê bi nameyê girseyî vend dîya dezgehanê Ewropa ke wa vera hêrişanê dewleta tirke û çeteyanê ci bêveng memanê.

Wekîlê Partîya Çepe yê Swêdî Jonas Sjöstelt,Wekîlê Partîya Çepe yê Baskî Pernando Barrena çalakîye de qisey kerd vat ê paştî danê xoverdayîşê şarê Rojawanî yê vera hêrişê îşxalî.

Temsîlkarê PYDyî yê Ewropa Fuat Omerî vist vîrî ke çeteyê DAÎŞî newera bîyî ganî û vat: ''Ganî hêzê mîyanneteweyîyî, Parlamentoyê Ewropa lezabez bi giranîye na meseleye bigîrê dest.'' Omerî veng da kurdan zî û vat: ''No têna şerê Rojawanî nîyo, no şerê azadîye yê Rojhelatê Mîyanên o. No şerê pêro Kurdîstanî yo.No şerê şaranê Kurdîstanî yo.''

Hemserekê Kongreya Neteweyî ya Kurdîstanî Ahmet Karmusî zî veng da Parlamentoyê Ewropa, Konseya Ewropa,rayapêroyîya Ewropa û vat: ''Eke hêrişî nêrê vindertene do tradejîya merdimîye bêro ciwîyayene. Ma veng danê Yewîya Ewropa, eke rolê xo kay bikero, vera hêrişanê dewleta tirke tewir bigîro, beno ke verê trajedîya merdimîye û qirkerdişan bêro girewtene.''