Polîsanê Brîtanya 27ê teşrîna peyêne de eştbi Merkezê Komelê Kurdan ê Londonî (KCC) ser û xeylê kurdî bindest kerdbî. Kurdê destbendkerdeyî hema zî nezaret de yê. 

Bînaya KCCyî zî hema binê ablûqa de ya. Dormeyê bîna bi têlan ame girewtene. Kurdîstanijan kuçeyê bîna de xeyme akerde û grevê vêşanîye de dewam kenê. Nê mabênî de seba protestokerdişê polîsan esnafan kuçe de dikanê xo anêkerdî.

Ancî vengdayîşê Yewîya Hêzî ya Demokratîke ser o bi hezaran kurdîstanijan û dostanê înan verê Merkezê Komelê Kurdan ê Haringeyî de çalakîye kerdî. Girseyî pankartî akerdî û tedeya polîsan şermezar kerde.

Nameyê DGByî ser o Yusuf Açilî qisey kerd û var ke bi nê tedayan Brîtanya destekê xo yê seba Tirkîya eşkera kena. Açilî îfade kerd ke ê do tim dezgehanê xo bipawê.

Hemsereka BAFî Dîleke Încedal zî îfade kerd ke ê qedexeyê polîsan nêşinasnenê.

Hemserekê Meclîsê Şarê Kurdî yê Londonî Îshak Mîlanîyî dîyar kerd ke dewleta Brîtanya waştişê dewleta tirke ser o hêrişê kurdan kena û vat: ''Wa nê operasyonî biqedê. Ma do erjanê kurdan tim bipawê.''

Dima girseyî rayraşîyayîş kerd û sloganê sey "Kurdistan wê ji faşîzmê re bibe goristan", "Jin jiyan azadî",  "Bê Serok jiyan nabe", "Terorîst dewleta Tirk", "Polîsên faşîst" vatî. Polîsan hêrişê girseyî kerd û ciwanê bi nameyê Abdulkadîr destbend kerd.

Grevê veşanîye verê merkezî de dewam keno.