Turan Satiyo ke babîyê 11 domanan o 30ê teşrîna peyêne de Bedlîs de wesayîtê zirxînî yê leşkerî da piro wafat kerd. Keyeyê Satiyî û dewijanê ci waşt ke gerreyê leşkeran bikê labelê dozgerê qezaya Adilcewazî waştişnameyê gerreyî zî nêvist muamelekerdene.
Şaristananê Vakurê Kurdîstanî de binpaykerdişê heqanê merdiman dewam keno. Bedlîs û qezayanê ci de kerdişê rewşa îstîsnayîye dewam kenê asayîşê merdiman hînî çin o. Dewa Qerekeşîşî ya Adilcewazî ya Bedlîsî de 30ê teşrîna peyêne de Turan Satiyo 40 serre wexto ke bi qemyonê xo ser o bi rayîrê Bedlîs-Tetwanî de wesayîtê zirxînî yê leşkeran da piro û wefat kerd.
Dima ke Satiyî wefat kerd keyeyê ci û dewaijanê ci waşt ke gerreyê leşkeran bikê labelê serdozgerê Adilcewazî waştişnameyê keyeyê Satiyî nêvist prosesê hukmkerdişî.
Dewijêkê Satiyî vat: "Ma waşt ke pêro keyeyê Satiyî reyde gerreyê leşkeran bikê. Pêgoşîya leşkeran ra merdimêkê ma yo bîn zî merd. 11 domanê Turanî bêwayîr mendî. Hînî babîyê domanan çin o. Domanê ci yo qijêr 3 serre û ê pîlêr 16 serre yo. Guneyê nê domanan çi yo? Serebûto ke Tûran rîyê ci ra merd qeza ney cînayet o. Wesayîtê leşkerî rayîr de çilayanê xo tanêvisnenê bi nê hawayî şinê. Naye ra dewijê ma Turan merd. Nê cînayet de dewlete berpirsîyaran pawena, nêverdana ke ma gerreyê înan bikê. Walîyê Bedlîsî, selahîyetdarê leşkerî û selahîyetdarê dewlete ameyî dewa ma û waşt ke ma gerreyê leşkerî nêkerê."
