Fermandarê Pêroyî yê Hêzanê Sûrîyeya Demokratîke (QSD) Mazlûm Ebdî hesabê medyaya sanale de eşkera kerd ke Minbic de adirbirnayîş ame kerdene.

Eşkerayîye de nê ameyî vatene: ''Minbic de seba ke verê hêrişanê ke rojawanê Firatî ra yenê, bêro girewtene xoverdayîşê şervananê ma dewam keno. Bi mabênçîya Amerîka semedê pawitiş û asayîşê sîvîlan babeta adirbirnayîşî de pêkerdiş ame kerdene.

Şervanê ma yê Meclîsê Leşkerî yê Minbicî yê ke 27ê teşrîna peyêne ra nata xover danê, demê kilmî de do herême ra vejîyê.

Waştişê ma o yo ke wa heme herra Sûrîye de adirbirnayîş bibo û semedê ameyoxê welatî prosesêko sîyasî bêro destpêkerdene.''