Mêrdîn de cinîyî vera hîşmendîya serdestîya camêrdan vejîyayî meydanan

Têgêrayîşê Cinîyan ê Azadan (TJA) çarçewa kampanyaya 'Ma xo pawenê' de Mêrdîn de çalakîyêke kerde. Cinîyan ard ziwan ke ê do vera zulmî sereyê xo nêarê warî.

TJA kampanyaya xo ya 'Ma xo pawenê' Mêrdîn de daye destpêkerdene. Cinîyî verê bînaya HDPyî de kom bîyî û înan derheqê kampanya de eşkerayîyêke daye. Vervatoxa HDPyî û Wekîla Mêrdînî Ebru Gunay û Wekîle Pero Dundar tewrê çalakîyî bîyî.

Endama TJA Eyleme Almak çalakîye de eşkerayîye wende û da zanayene ke pêro welat de şîdetê vera cinîyan zêdîya. Eyleme vat: ''Vera hêrişan ma do gamêke apey nêerzê, vera tecrîdî ma do azadîye bipawê. Cinîyî pêro waran de vera hîşmendîya serdestîya camêrdan têkoşîn kenê û Peymana Îstanbulî pawenê.''

Peynîya eşkerayîye de wina ame vatene: ''Ma do vera zulmî sereyê xo nêarê war û seba cuyêka azad û têdûşte xo ver bidê.''