Hemsereka HDP’yî ya Amedî Hulya Alokmen Ûyanike seba mîtîngê 22’ê Temmuze yê meydanê Îstasyone ke do bi şîyarê “Hemverê şerî de çareserîya demokratîke” bêro viraştene vat, “Mîtîngê ma seba xurtkerdişê aşitîye yo.”
Partîya Şaran a Demokratîke (HDP) 22’ê Temmuze saete 17 de meydanê Îstasyone de do mîtîngêk virazo.
Yeno pawitene ke merdimê bajaranê dormeyan zî tewrê mîtîngî bibê. Pîya bi hemsereka KCD’yî Leyla Guvene, hemserekê HDP’yî Sezaî Temellî, hemserekê DBP’yî Mehmet Arslan, temsîlkarê Têgêrayîşê Cinîyan ê Azadan, Konfederasyonê Sendîkayanê Kedkaran ê Pêroyî (KESK) û partîyê Kurdistanîyî tewrê mîtîngî benê û do mîtîng bi slogana “Hemverê şerî de çareserîya demokratîke” virazîyo.
Hemsereka HDP’yî ya Amedî Hulya Alokmen Ûyanike derheqê mîtîngî de qisey kerd û vat, “Weçînitişanê 31’ê Adare de ma dî ke cimat çi wazeno û wezîfeyêko senên pêşkêşê sîyasetî kerdo. Na yewe ra ma wazenê aşitîye xurt bikerê û bi nê amacî mîtîng virazê.”
Hulya Alokmen Ûyanike ard ziwan ke ogranîzasyonê Kurdistanîyî yê ke weçînitişanê 31’ê Adare de înan dir tîfaq ronayo do tewrê mîtîngî bibê û vat, “Pîya waştişê aşitîye ma do heman wextî de seba yewîya şarê Kurdî zî vengê xo berz kerê. Derheqê destekê îdareyê Başûrî yê seba operasyonan de zî vatişêkê ma esto. Seba mîtîngî ma muracatê xo yo fermî kerd, xebatê organîzasyonanê ma yê bajar û qezayan dewam kenê. Ma pawenê ke do bajaranê dormeyan ra zî tewrbîyayîş estbo. Ma pawe yê ke hemeyê şarê ma tewrê mîtîngî bibo.”
