HDP’yî taxa Barişî ya Nisêbînî ya ke wextê qedexeyê tebervejîyayîşî hama hama temamê ci amebi rijnayene de buroyê weçînitişî akerd. Akerdişê buroyê weçînitişî yê HDP’yî yê Nisêbînî eleqeyo gird ame ramojnayene.

Namzeda hemserekîya Şaredarîya Nisêbînî Semîre Nergîze ard ziwan ke, ê bi reng û coşê şarî û ciwananê Nisêbînî weçînitişî de do ser bikewê û vat, “Ma namzedê ke nê bajarî teberê cîyakerdişê bawerî, ziwan û zayendîye de îdare bikerê.”

Namzedê hemserekîya Şaredarîya  Nisêbînî yo bîn Ferhat Kurtî zî da zanayene ke, seba înan weçînitişê 31’ê Adare  cîya yo û vat, “31’ê  Adare roja vera ê kesan ê ke îradeyê şarî dest ra girewto de, îradeyê şarî newe ra teslîmkerdişî ya. Serkewtişê ma yeno manaya rijîyayîşê MHP û AKP’yî.”

Namzedê hemserekîya Şaredarîya Girdî ya Mêrdinî Ahmet Tirkî bala ante serê Leyla Guvena ke vera tecrîdkerdişê Rayberê Şarê Kurdî Abdullah Ocalanî 109 rojî yo grevê vêşanîye de ya û na çalakîye silam kerde. Ahmet Tirkî ard ziwan ke şarê Kurdî zaf dejî dîyî û bedelê zaf girdî dayê û nê zî seba azadîya xo kerdê û vat, “Ma do verê nê kayan bigêrê. Şarê Kurdî tena seba Nisêbînî nê, şarê Kurdî seba ameyoxê xo, xo amedê bikero. Her kes bizano ke sîyaseto ke yeno kerdene  nêwazenê. Ma reyna vanê ke roja 31’î Adare roja ma ya. Ma do cewabêko tewr baş bidê qeyûman.”