OHD: Ganî heqê weşîye yê tepişteyan sey esas bêro girewtene

Avûkate Gulane Çagin Kalelî pare kerd ke rewşa tepişteyanê sîyasîyan meselêka weşîye, huqûqî û polîtîk a û ganî heqê weşîye sey esas bêro girewtene.

Rewşa tepişteyanê Tirkîya her roje bena giran. Bi taybetî serranê peyênan de zaf tepişteyê nêweşî merdî. Her çiqas rêxistinê heqanê merdiman xîret bikerê zî hukmatê Tirkîya na babete de xo keno sey kerr. Sekretera Pêroyî ya Komeleya Huqûqî ya Seba Azadîye (OHD) avûkate Gulane Çagin Kalelî rewşa tepişteyanê nêweşan ser o ANF reyde qisey kerd.

Avûkate Kalelî da zanayene ke hûmara tepişteyanê nêweşan resaya 1.334 kesan û rewşa 458ê ci zî giran a. Kalelî vat: "Zaf tepişteyî estê ke rewşa xo nêane rojdem. Coka merdim nêeşkeno hûmarêka zelale vajo. Ma seba rewşa tepişteyanê nêweşan zîndanan zîyaret kenê la ma tim rastê astengan yenê. Binê madeya 6411î de şerhêk esto ke ci ra semed tepişteyê nêweşî nênê veradayene. Şerh de vano:'Seba asayîşê komelî tehlûke yo' No şerh astenganê tewr pîlan ra yew o. Karê ma yo verên no yo ke ma nê şerhî biwedarê.

Rewşa tepişteyanê nêweşan şert û mercanê zîndanan ra bena giran. Bi giranî seba nêweşîyanê zerrî û pîze muracat yeno kerdene. No zî rewşa werdê zîndanan mojneno. Ganî firsendê weşkerdişî estbê la na babete de kêmasîyî estê. Zîndanan de hetê koxuşan ra heqê tepişteyan zaf zêde yenê binpaykerdene. Tîje nêresena nê koxuşan û tede rîskê enfeksîyonî zêde yo. Weşkerdişê bi kelemçeyan zî binpaykerdişo verên ê heqanê merdiman o.

Mesela tepşteyanê nêweşan meselêka weşîye, huqûqî û polîtîk a. Seba çarserkerdişê mesela weşîye ma xîret kenê, gaman erzenê labelê xîretê ma yenê astengkerdene. Her çi ra ver ganî madeya şerhê 6411 bêra wedarene. Ganî heqê weşîye yê merdiman ver de bêrê.Ganî çarçewa heqê weşîye de ercnayîşê objektîfî bêrê kerdene."