Ozsoy: Amerîka her parçeyê Kurdîstanî de do polîtîkayêka cîya bîyara ca

Komîsyonê Têkilîyanê Teberî yê HDPyî Hişyar Ozsoyî ard ziwan ke kurdî Serekê neweyî yê Amerîka Joe Bidenî ra zaf çî pawenê û vat Amerîka her parçeyê Kurdîstanî de do polîtîkayêka cîya bîyara ca.

Komîsyonê Têkilîyanê Teberî yê HDPyî Hişyar Ozsoyî derheqê polîtîkayanê Serekê neweyî yê Amerîka Joe Bidenî de qisey kerd û îfade kerd ke Amerîka Rojawan, Vakur, Başûr û Rojawanê Kurdîstanî de do polîtîkayêka cîya bîyara ca.

Ozsoyî vat: ''Amerîka Rojawan û Başûrî reyde têkilîyanê xurtan viraza la Vakur de paştî bida polîtîkayanê mîlîtarîstan ê Tirkîya.''

Ozsoyî ard ziwan ke Biden statuyo ke Trumpî zerar da ci, do raşt bikera û vat: ''Biden do NATO û Yewîya Ewropa (YE) de gamanê neweyan bierzo, nêzdîyê YE bibo. Eke wina bibo Erdogan do nêeşko sey verî Amerîka vera YE bixebitno.''

Ozsoyî bale ante ser ke rayapêroyî ya kurdan Bidenî ra zaf çî paweno ser û nêzdîbîyayîşê Bidenî yê vera kurdan zî wina ercna: '' Çew vano qey Trump şi, Biden ame zaf çî vurîyeno la xora Biden temsîlkaranê tewr pîlan ê statukoyê Amerîka û sembolo tewer zelal ê  nêzdîbîyayîşê Amerîka yê vera kurdan ra yew o. Biden 40-45 serran o Amerîka de serdest o. Biden do xeylêk çîyan bivurno. La tay çîyî qet nêvurîyenê.''