Seba çalakîyanê Şorişê Rojawanî vengdayîşê tewrbîyayîşî ame kerdene

Women Defend Rojava, Internationalist Commune û RiseUp4Rojava derheqê serrgêra Şorişê Rojawanî de eşkerayîyêke daye û vat: ''18-19ê temmuze de ma pabeyê ci yo ke her kes tewrê çalakîyan bibo.''

Women Defend Rojava, Internationalist Commune û RiseUp4Rojava derheqê Şorişê Rojawanî de eşkerayîyêka hempare weşanaye. Eşkerayîyeyan de seba wayîrvejîyayîşê Şorişê Rojawanî veg ame dayene ke 18 û 19ê temmuze de her cayê dinya de çalakîyî do bêrê kerdene.

Eşkerayîye wina ya:

''Serrgêra 8. ya Şorişê Rojawanî ya 19ê Temmuze eman wextî de serrgêra 41. ya Şorişê Nikaragua û serrgêra 84. ya Şorişê Îspanya ya. 19ê Temmuze seba pêro dinya girîng o. 19ê temmuze de 8 serrî verê cû Kobanê de Rojawan de şorişê tewr pîlî yê  seserra 21. dest pêkerd. Şorişê Rojawanî seba parçeyanê bînan ê Sûrîye, Rojhelatê Mîyanênî û temamîya dinya hêvî yo. Şorişê Rojawanî bingeyê azadîya cinîyan o. Rojawa şorişê cinîyan o. Tarîx mojna ma ke eke ma pîya şer bikerê, pîya bimusê  ma do ser bikewê. Bi seyan zerrîwazê dinya ewro beşdarê têkoşînê şorişî yê Rojawanî benê. Heta ke hîşmendîya pederşahî nêra çinkerdene ma do nêeşkê kapîtalîzm, kolonyalîzm û faşîzm çin bikerê.

Modernîteya kapîtalîste û faşîzm Rojhelatê Mîyanênî de şekilê DAÎŞî û dewleta faşîste ya Tirkîya de xo nîşan danê. La hêzê modernîteya demokratîke, cinîyî, ciwanî, karkerî, bindestî xîretanê îşxalî û qirkerdişî qebul nêkenê, şerê xo dewam kenê û alternatîfêk awan kenê.

Nê wextan de ma sey têgêrayîşêkê xoverdayîşê universalî verê xo danê şorişî!

 MA SEBA ROJAWANÎ PAYAN SER Ê!

Ma sey Women Defend Rojava, Internationalist Commune û RiseUp4Rojava 18-19ê temmuze de vera kolonyalîzm, faşîzm û rijnayîşê xoza veng danê. Ma do nawnayîşan awan bikerê, pê pêro metodan dinya de protestoyan bikerê. Ma venga her kesî danê ke nê rojan de tewrê çalakîyan bibê.

 MA SEBA ROJAWANÎ PAYAN SER Ê!

Şorişê Rojhelatê Mîyanênî û ê temamîya dinya do ser bikewo, faşîzm do bêro şiknayene.

Biciwîyo paştdayîşo mîyanneteweyî!''