Merkezê erdlerzî Sîvrîce de nêweşxane çin o

Ame eşkerakerdene ke merkezê erdlerzê Xarpêtî Sîvrîce de nêweşxane çin o. Erdlerzî ra 10 rojî verê cû şarê Sîvrîce muracatê Mudirîyetê Weşîye yê Şaristanî û Wezaretê Weşîye kerdbi. Şarî îfade kerd ke seke ê bi zanayîşî yenê kiştene.

Merkezê erdlerzê Xarpêtî Sîvrîce de nêweşxane çin o. Verê cû Sîvrîce de 3 erdlerzê pîlî qewimîyayî la her çiqas şarî zaf xîret kerdbi zî  seba awankerdişê nêweşxaneyêkî gamêke nêameye eştene. Qeza de têna merkezêkê weşîye esto. Muracatê roniştoxanê Sîvrîce yê seba nêweşxaneyêkî  hetê selahîyetdaran ra ame peygoşkerdene.

10 rojî verê cû şarê Sîvrîce seba awankerdişê nêweşxaneyêkî kampayaya îmza dabî destpêkerdene û muracatê Wezaretê Weşîye û Mudirîyetê Weşîye yê Şaristanî kerd.    

Roniştoxa Sîvrîce Zehra Ozturk da zanayene ke serran ra nata înan ê kenê ke qeza de nêweşxaneyêk bibo. Ozturke vat:  ''Ma zaf reyî seba nêweşxaneyî muracat kerd. Tim ma rê soz ame dayene. La kesêk çîyêk nêkeno. Çew eleqe nêmojneno. Seke hêdî hêdî yenê kiştene.''

Hemsereka Şubeyê Xarpêtî ya SESî  Derya Coşkun zî eşkera kerd ke seba ke Sîvrîce xeta fayê erdlerzî ser o ya ganî cade tede nêweşxane bêro awankerdene.  Coşkune vat: "Sîvrîce de weşîya merdiman yena peygoşkerdene. Merdimî nêeşkenê heqê xo yê xizmetê weşîye bixebitnê. Ma do xîret û xebat bikerê ke nêweşxane bêro awankerdene."