Federasyonê Komeleyanê Huqûqî û Paştdayîşî yê Keyeyanê Tepişteyan (MED TUHAD-FED) û avûkatanê Komeleya Huqûqnasan a Seba Azadîye (OHD) şîyî zîyaretê tepişteyanê ke serewedaritişê Zîndanê Êlihî ra dima erşawîyayî Zîndanê Amedî. Dezgehan pare kerd ke serewedaritişî ra dima 400 tepişteyî ameyî surgunkerdene.

Dezgehan raporêk amade kerd. Rapor de nê çîyî ameyî parekerdene:

''Tepişteyî goreyê qaîdeyanê temasê komelkîyî nêameyî cadayene. No zî eşkera keno ke weşîya tepişteyan ameye peygoşkerdene. Seba pêvînayîşê pê telefonî zî ame vatene ke xeta telefonan nêancena. Pêvînayîşê pê tepişteyan zî bi qerayîşê peyê caman ra ame kerdene. No zî yeno manaya binpaykerdişê heqê pawitişî. Gardîyanî kampus û otobus de goreyê qaîdeyanê temasî tênêgêrayî. Otobus pirr bibi û tay kesî zî payan ser o vindertî.''

Rapor de ame eşkerakerdene ke ''Serewedaritişî ra dima xebatkaranê rîngî maske xebitnayêne la destanê înan de lapikî çinbî. Wextê sewqî de tepişteyan rê heqaret ame kerdene. Wextê sewqkerdişî û şîyayîşê Zîndanê Amedî de zî vera tepişteyan şîdet ame kerdene û ê ameyî derbkerdene. Amed de zî komêka pîle da tepişteyan ro.''

Rapor de ame vatene ke bedenê tepişteyan de rêşê pirodayîşî estê, mazlemeyê pakîye înan rê nêameyî dayene, tepişteyan keyeyanê xo reyde pêvînayîş nêkerd û pêvînayîşo verên 10 rojan dima do bêro kerdene.

Rapor de ame waştene ke ganî zîndanî dezenfekte bibê, gardîyanî goreyê qaîdeyanê temasê komelkî têbigêrê, kontrolê weşîye yê tepişteyan bêro kerdene, malzemeyê hîjyenî û pakîye bêro dayene tepişteyan, heqê pêvînayîşê pê telefonî bêro caardene, heyetêkê avûkatan û temsîlkarê baroyan şorê zîyaretê tepişteyan û proses teqîb bikerê.