Tepişteyo  ke ame derbkerdene nêeşkeno qisey bikero

Zîndanê Xarpêtî yê bi Asayîşê Berzî yê Hûmara 2’ine de tepişteyê ke hetê gardîyanan ra ameyî derbkerdene înan ra Medenî Kîye nêeşkeno qisey bikero.

Zîndanê Xarpêtî yo ke timûtim bi binpaykerdişê heqanê merdiman rojdem de yo de gardîyanan bisebebo ke tepişteyan embazanê xo yê odayê bînî de qisey kerd, hêrişê înan kerdbi. Ame zanayene ke nêtîceya nê hêrişî de tepişteyo bi nameyê Medenî Kiyeyo ke  bi giranî birîndar bibi nêeşkeno qisey bikero.

Waya Kîyeyî Hatîce Kîye da zanayene seba ke birayê aye hetê gardîyanan ra ameyo derbkerdene nêeşko qisey bikero û vat: ‘’ Ma muracatê Komîsyonê Zîndanan ê Baroya Wanî û Şûbeyê ÎHD’yî kerd û gerreyê berpirsîyaran kerd. Ma semedê cuya birayê mi biqisawet ê. Bi fermanê mudurî hêriş ameyo kerdene. Ma semedê îdareyê zîndanî pêhesnayîşê sucî kerd. Xora qewimîyayîşê wînayên xeylî zîndananê bînan de zî estî. Vanê ma dewleta huqûqî ye la çîyêkê kenê eleqeya ci bi huqûqî çîn a. Reyna sazîyê mîyanneteweyîyî zî çîmê xo girewtî. Binpaykerdişê heqanê merdiman ê Tirkîya nêvînayîş ra yenê. No sucê merdimîye yo. Ma do peynîya naye canêverdê.