Xoverdayîşê Amedî: No pêrodayîş, pêrodayîşê ma yo, ma do ser bikewê

Parlamentera HDP’yî Oya Ersoy a ke xoverdayîşê Amedî yê roja 7’ine de qisey kerd va: ‘’ No pêrodayîş  vera faşîzmî pêrodayîşê hurîyetî yo, no pêrodayîş, pêrodayîşê ma yo, ma do ser bikewê.

Amedo ke 19’ê Tebaxe roja xespkerdişê şaredarîyanê Amed, Wan û Mêrdînî ra payan ser o, ewro reyna çalakîyêk ameye viraştene. Eşkerayîye de mesajê xurtkerdişê mucadeleyî ameyî dayene.

Amed de roja 7’ine ya xoverdayîşê vera qeyûman de reyna çalakîyêk ameye viraştene. Xeylî parlamenter û hemşaredarê HDP’yî, hemşaredarê Bajarê Pîlî yê Amedî yê HDP’yî Selçûk Mizrakli yo ke wezîfeyê ci dest ra ameyo girewtene, aktîvîstê TJA, Mayê Haştîye, temsîlkarê partîyanê sîyasîyan û dezgehanê cimatê sivîlî û xeylî hemwelatijî tewrê çalakîye bîyî.

Çalakîye de verê  serekê pêroyî yê Halkevlerî Nurî Gunayî qisey kerd. Guneyî bale ante çalakîyanê protestoyî ser û va: ’’Çalkayî ramojnenê ke şar îdareyêko demokratîk wazeno. Înan ke morê xo dayo binê na neheqîye ro wa hol bizanê ke ê do vera îradeyê şarî ser mekewê.’’

Bado zî parlamentera HDP’yî Oya Ersoye qisey kerd. Ersoye va: ‘’No mucadeleyê cinîyan o. Qeyûm tewr sere de sîstemê hemserekîye yê cinîyan hedef girewt. Ma yê ke  wazenê nê welatî de  mîyan haştîye, seypêyîye û azadîye de sey wayûbirayî bicuwîyê, ma do vera sîstemê qeyûmî mucaleyî rê dewam bikerê. No pêrodayîşê  vera faşîzmî pêrodayîşê hurtîyetî yo, no pêrodayîş, pêrodayîşê ma yo, ma do ser bikewê’’