4 şaredarîye bînî yê HDPyî ameyî xespkerdene - Newe Bîye

Îqtîdarê AKP/MHPyî Wan û Êlih de 4 şaredarîye bînî yê HDPyî xesp kerdî. Îqtîdarî sey xeylêk cayanê bînan ê Kurdîstanî hemşaredarê ke hetê şarî ra ameyî vîjnayene destbend kerdî, karî ra vetî û herinda înan de merdimê xo ca kerdî.

Şarêdarîya bajarekê Awiskî yê qezaya Qûbînî ya Êlihî û şaredarîyanê Qelqelî, Elbak û Bêgirî yê Wanî de qeyûm ame cakerdene.

Leşkeran eşt Şarêdarîya Awiskî ser. Leşkeranê ke şaredarîye girewtê binê ablûqa banê xizmetî de cigêrayîş kerd. Gama ke cigêrayîşî dewam kerdêne Wezîrîya Karanê Zereyî eşkerayîyêk daye  vat saba ke derheqê Hemşaredar Osman Karabulut de dewa esta karî ra ame girewtene û herinda ci de Qaymeqamê Qûbînî Sînan Aşçi sey qeyûmî ame cakerdene.

Wan de zî şaredarîyanê qezayanê Elbak, Qelqelî  û Bêgirî de qeyûm ame cakerdene. Hemşaredarê Qelqelî  Dîlane Orencî û Yakup Almaş,  Hemşaredarê Elbakî Erkan Acar  û hemşaredarê Bêgirî Leyla Balkan û Yilmaz Şalan virzêr sereştişê keyeyan de ameybî destbendkerdene. Qaymeqamê Qelqelî Abdulkadîr Çelîk herinda Almaç û Orencî de, Qeymeqamê Elbakî Asim Solak herinda Acarî de û Qaymeqamê Bêgirî Erkan Savar herinda  Balkane û Şalanî de sey qeyûmî ameyî tayînkerdene.

Polîsanê ke qerarê qeyûmî bi nuşteyêkê fermî teqdîmê Şaredarîya Qelqelî kerd bînşewe ra nata banê şaredarîye de cigêrayîş kenê. Polîsan bêrê kiîtkerdeyî şikitî û endamanê Meclîsê Şaredarîye nêgênê zereyê bîna. Şaredarîya Elbakî zî binê ablûqa de ya.

Hemşaredarê Qelqelî Yakup Almaç û Dîlane Orencî, hemşaredarê Elbakî Erkan Acar û hemşaredarê Bêgirî Leyla Balkan û Yilmaz Şalan yê ke vizêr sereştişê keyeyan de ameybî destbendkerdene Mudirîya Asayîşî de yenê pawitene û destûrê vînayîşê avûkatan yeno astengkerdene.

Pîya bi qeyûmanê peyênan şaredarîyê HDPyî yê 3 bajaranê girdan, 26 qezayan û 2 bajarekan ameyî xespkerdene