Parlamentera Partîya Demokratîke ya Şaran (HDP) a Şirnexî Nuran Îmîre derheqê polîtîkayanê AKPyî yê zordaran û operasyonanê qirkerdişê sîyasîyî ke 9ê Teşrîna verêne Kurdistan û Tirkîye de ameybî viraştene ANFyî rê qisey kerd. 

Îmîre vat: „No cehdê qedênayîşî û bêîradekerdişî eslê xo de prosesê xoverdayîşî dir zî têkildar o. Ewro gama ma ewnênê têgêrayîşê kurdan prosesê 2009î ke ma eşkenê sey tekrarbîyayîşê tarîxî name bikerê ciwîyeno. Nê hêrişî hemverê şaranê ke demokrasî, aşitî û têver de ciwîyayîşî de israr kenê yenê viraştene.“  

'PROSESÊ SEREWEDARTIŞÊ DEMOKRATÎKÎ'

Îmîre dewamê qiseykerdişê xo de vat rixmê heme zext û zordarîyanê ke ronayîşê komare ra heta ewro dewam kenê şarî ameyî têver û cepheyêko muxalif ard ra. Bitaybetî polîtîkaya raşanayîşî ke serra 2015 ra tepîya kewte dewre bi des hezaran kadroyê înan ameyê tepiştene û hemverê nê zextan de eşkayê referandûm de cepheyê „Nê“yî biyarê ra.

Îmîre vat HDP hemverê cepheyê şerrî yê AKP-MHPyî de roje bi roje beno xurtir û ard ziwan ke nê xurtbîyayîşî xo weçînitişanê 24ê Hezîrane de zî ramoto.

'HÊRIŞÊ KE BI TALÎMATANÊ ERDOGANÎ VIRAZÊNÊ'

Îmîre ard ziwan ke her çend kurdî wayîrê statu nêyê zî israrêko cidî esto û vat: „No israr bi waştişê AKP û MHPyî nê, bi temamî bi dîzaynê Rojhelatê Mîyanênî yê hêzanê mîyan-neteweyîyan o. 

Faşîzm her roje hîna zaf beno hêrişkar. Hêrişê ke Batman de dest pêkerdê û 9ê Teşrîna verêne de vejîyayê meydan estê. Nê mudahaleyê alelade nêyê. Hetê teknîkî ra qezenckerdişê yan zî nêkerdişê şaredarîyêk ra wetêr ê.“

'MEKANÎZMAYÊ DEWLETE RAŞÎYAYÊ'

Îmîre ard ziwan ke mekanîzmaya dewlete Kurdistan de raşîyaya û nêxebetêna. Peynîya qiseykerdişê xo de vat: „Welat hendî agêrayo dewleta polîsan. No rejîm bi vîyarteyê şaranê ke hemverê bicaardişanê antîdemokratîkan xo ver danê zaf rind zano. Nê hêrişî do açarîyê firsetan, ma do hîna zaf organîze bibê û bibê pîl. Wa gumanê çewî nê ra çinêbo.“