Amed de 22 kesî ameyî destbendkerdene

Amed de 22  kesî ameyî destbendkerdene. Pîya bi înanê ke ewro ameyî girewtene, hûmara destbendkerdeyanê hewteyê peyînî resaye 59.

Çarçeweya cipersayîşanê Serdozgerîya Komare ya Amedî de 8ê kanûne de qezayanê Peyas, Çinar û Baglarî yê Amedî de 20 kesî ameyî destbendkerdene.  Reyna vizêr  qezayanê Baglar, Pîran, Licê, Hênê û Karazî yê Amedî de 17 kesî ameyî destbendkerdene. Ewro zî  di dewanê Peyasî de 22 kesî ameyî destbendkerdene. Pîya bi destbendkerdişanê peyênan hûmara destbendkerdeyanê  nê  hewteyê peyînî resaye 59.

Mudîrîya Asyîşî ya Amedî  îda kerd ke înan cigêrayîş de 271 kîlo 475 gram madeyê teqayîşî, 8 hebî bombayê destî, 12 hebî roketê ke bi destî ameyî viraştene, 7 hebî çekî,  û xeylêk guleyî, kapsulê bielekrîkî, pusula, dûrvîn û xeylêk belge û talîmatê rêxistinkî  û malzemeyê cuya ame destfînayene.