Amed û Dîlok de xeylêk kesî ameyî destbendkerdene

Amed de û Dîlok de polîsan serê sibayî eşt xeylêk keyeyan ser û Vervatoxa TJA Ayşe Gokkan zî tede bi desan kesî destbend kerdî.

Ewro serê sibayî rew polîsanê tirkan  Amed û Dîlok  de eşt xeylêk keyeyan ser bi desan kesî destbend kerdî.

Sereştişan Amedî de Edîtora Jinnewsî û Vervatoxa Platformê Rojnamegeran ê Cinîyan ê Mezopotamya Ayşe Guney, Vervatoxa Têgêrayîşê Cinîyan ê Azadan (TJA) Ayşe Gokkan, Hemsereka MED-TUHAD FEDî Elîfe Haran, Endama Komeleya Hetkarîya Keyeyanê Tepişteyan (TUAY-DER) Rabîa Ateş, Endama Meclîsê  Şaredarîya Rêzanî Panayire Çelîk, Hemsereka Verêne ya HDPyî ya Yenîşehîrî Demete Ozkaran, Zekîye Guler, Fîgene Ektî, Ronda Bat, Rozerîne Çatak, Emîne Kaya, Dîlane Yakut û Guneşa ke peynameyê ci nêzanîyeno, zî tede xeylêk cinîyî ameyî destbendkerdene.

Ame zanayene ke polîsan eşt keyeyanê Îdarekara TUAY-DERî Bahare Akyapi û Hemsereka HDPyî ya Sûrî Hatune Yildiz ser zî la ê keye de nêbîyî.
Sebebê destbendkerdişê cinîyan nêzanîyeno. Cinîyî ameyî berdene bi Mudirîya Asayîşî ya Amedî.

Dîlok de  zî Hemserekê HDPyî yê Dîlokî Musa Aydin, Hemserekê HDPyî yê Şahînbey û Şehîtkamîl, Hemserekê DBPyî yê Dîlokî Mehmet Vural, 2 muxtar û avûkatêke zî tede 33 kesî ameyî destbendkerdene.

Sereştişan de berî ameyî şiknayene. Destbenkerdeyî ameyî berdene bi Mudirîya Asayîşî ya Dîlokî.