Dîlan Îzola ke qezaya Sêwregî ya Riha de rîyê nêpêkerdişê erazî ra keyeyê ci verê çimanê ci de ame qetilkerdene, vat qewimîyayîş senî ke yeno îdîakerdene pêrodayîşo bisîleh nê qetlîamêko plankerde bi.

Dîlan Îzole derheqê qewimîyayîşo ke bi telefonî qeyd kerdo de ANF’yî rê qisey kerd. Îzole vat: ’’Maya mi Zozan, pîyê mi Hakki, naca mi Meral û dezayê mi Mûsa Serhat Îzol hetê birayanê parlamentero verên ê  AKP’yî Zulfikar Îzolo ke merdimê ma yo ra ameyî qetilkerdene. Dimayê qetilkerdişî zî bedenê bêganî derb kerdî.’’

Îzole vist vîrî ke  17 serrî yo deweyêka erazî ya înan  esta û wina dewam kerd: ‘’Serra 2013 apê mi Mehmet Alî Îzol zî şewa hineyê  xo de ame kiştene. La serê qewimîyayîşî ame girewtene. Parlamentero verên ê AKP’yî Zulfîkar Îzol dezayê pîyê mi no û tim bi kayanê leyminan waştêne erazîya ma dest bifîno. Pîyê mi xapîna û tapûyê ma berdî xo ser. Va ez reyna peyser dana, la nêdayî û bi birayanê xo tim ma tehdît kerdêne  ke ma herra xo ra vejîyê. Tewr peynî de zî no qetlîam kerd. Birayanê Zulfîkar Îzolî Cemal, Bulent, Cîhan û lajê ci Ferman Îzol û pîya bi 8 kesan maya mi, pîyê mi, naca mi û dezayê mi qetil kerdî. Di dezayê mi Mehmet Metîn û Yûsûf Rojhat Îzol ê ke birîndar bîyî ê zî ameyî destbendkerdene.’’

Dîlan Îzole ard ziwan ke kesêk înan rê hetkarî nêkerda û qiseykerdişê xo wina qedîna: ‘’Ma cenazeyê xo bi destê xo defin kerdî.  Cendirmeyî qewimîyayîşî ra saeetêk ra dima ameyî. Ma anbûlans waşt la ambulans zî nêame. Ma birîndarî kirîştî û rayîr de wesayîtî vindarnayî bi nînan resnayî nêweşxane. Roja qetlîamî ra verê fermandarê Qereqolê Çaylarbaşi ame keyê ma û zaf persî persa. Dewlete  pey paşta qetilkaranê nê qetlîamî de ya. Ma 6 way û birayî bêkes mendî. Ma nêwezanê ke serê nê qetlîamî bêro girewtene. Wa vengê ma bêro eşnawitene û qetilkarî bêrê cezakerdene.''