Dr. Osman Şêx Îsayî pare kerd ke OPCW seba ke vera hêrişanê kîmyewîyan erkê xo nêkeno ci rê bawerîye nêna kerdene. Îsayî ard ziwan ke ganî doktorî zî vera hêrişanê kîmyewîyan tewirê xurtî bimojnê, cigêrayîşî bikerê û netîceyanê ney pare bikerê.
Dewleta tirke ya îşxalkere 14ê nîsane ra nata pê çekanê kîmyewîyan û bombayanê qedexekerdeyan hêrişê gerîlayan kena. Fermandarîya Qerargehê Merkezê Pawitişê Şarî (MPŞ) da zanayene ke menganê peyênan de 17 gerîlayî pê çekanê kîmyewîyan ameyê qetilkerdene.
Doktoranê Rojawanê Kurdîstanî ra Osman Şêx Îsayî derheqê babete de ANFyî rê qisey kerd.
Îsayî da zanayene ke çekê kîmyewîyî têna merdiman rê ney xoza rê zî zerarêkê pîlî danê û vat: ''Têna dewleta tirke nê hêzê ke vera hêrişanê kîmyewîyan bêveng manenê zî sûcî kenê. Ganî hêz û dezgehê mîyanneteweyî herême de nê hêrişan ser o cigêrayîşî bikerê û dewleta tirke ra hesab bêro persayene ke wa hînî çekanê kîmyewîyan meşuxilna.
Dewleta tirke têna Herêmanê Pawitişî yê Medya de nê Efrîn, Girê Sipî û Serêkanîyê û Rojawan de zî sûcanê şerî kena. Dewleta tirke seba pêro dinya tehluke ya. Ganî sere de doktorê kurdî pêro dinya de doktorî û Doktorê Sînonernenasî vera hêrişanê kîmyewîyan ê dewleta tirke tewirê xo bimojnê, nê hêrişan ser o cigêrayîşan bikerê û netîceyanê cigêrayîşî rayaumûmîye de vila bikerê. Ganî dewleta tirke bêra muhakemekerdene. Eke no tewir nêro mojnayene dewleta tirke hîna cesaret bigêra.''
Dr. Osmanî îfade kerd ke hêrişanê kîmyewîyan ê dewleta tirke ra verî OPCW mesuldar o la seba ke mesuldarîya xo nêano ca ci rê bawer nêno kerdene. Dr. Osmanî waşt ke wa OPCW vera hêrişanê dewleta tirke têbigêro.
