Nêrazîbîyayîşê vera hêrişanê dewleta tirke yê ke pê hetkarîya PDKyî vera Kurdîstanî benê, zêdîyenê. Eşîrê Fatimî yo ke  Rojawan de bi hezaran endamê ci est ê, ey zî hêrişê ke semedê îmhakerdişê kurdan yenê kerdene  û hemkarîye şermezar kerdî.

Şêxê Eşîrê Fatimî Haci Abddullahî vat: ''Dewleta tirke bi bahaneyê 'herêma biasayîşe' 12 serrî yo hêriş kena.Wazanê ke Îparatorîya Osmanîyî peyser bîyarê. Pê hêrişan kenê şarî herême ra vejê. Waştişê înan asayîş nê îşxal o. Konseptê îşxal û îmhayî çar leteyanê Kurdîstanî de yeno domnayene.  Rojawan, Başûr, Vakur û Rojhilat cîya nîyê, ma pêro yew ê.  Ganî çar leteyê Kurdîstanî bibê yew û verê nê îşxalî bigêrê. Ganî ma pêro paştî bidê yewbînan. Vera cîrananê ma Şingalî zî hêriş est o. Ê wayûbirayê ma yê. Ê zî hela ke pîya vera hêrişan vejîyenê, ma şa benê.''

Haci Abdullahî bale ante hêrsê kurdan ê vera hemkarîya PDKyî ser û vat: ''Pîya bi hêrişanê îşxalî xayînîye zî vejîyayî werte. Îxanet ma dejneno û ma hêrs benê. Gama ke ma fotografê Barzanîyan pa Erdogan û ê bînan vînenî ma hêrs benê. Semedê yewbîyayîşê kurdan verê ma de firsat est o. Ganî paştî nêdîyo dişmenî ke wazeno ma çîn bikero. Ê dişmenê kurdan ê û wazenê ma çîn bikerê.Têna kurdan nê heme şaranê ka pîya ciwîyenê hedef genê. Ma do vera hêrişanê îşxalî yê dewleta tirke û hemkaranê ci xover bidê. Ma îşxalê vera herra xo qebûl nêkenê.  Ganî şarê ma paştî bido gerîlayan û şerwananê azadîye yê ke vera îşxalî xover danê. Ma do heta dalpaya peyên a gonîya xo paştî bidê gerîlayan. PKK ser bikewo ma ser kewnê.''